ИшхIелла гIямру дебали хъярхъли ва жигарчерли гьаладяхI дашули сари. БархIиличи-бархIи сагадешуни дагьардирули сари, нушара илди пайдаласи баркьудилизир дузахъес къайгъилизирра. Илдигъунти сагадешуни бузерилизир къулайдешличил пайдаладирути адамти камли ахIен гьаннала замана. Илдала лугIилизивадси сай дила макьалала игитра.
Ишди бурхIназив 40 дус виуб Дагъиста Халкьла Собраниела депутат, предпринимательствола, инвестициябала, экономикала политикала шайчибси Комитетла председательла заместитель Булатов ГIусман Шамильевич. Лавашала районнизибадти дарган бегIтала уршили сай сецад ахъти къуллукъуначи ваили виалра, сунела аслу-миналичила хъумуртули ахIен. Даргандешла чихъти къиликъуни илала дагьардулхъули сари республикализир детурхути нешла мезла далдуцуначир жигарла бутIакьяндеш дирнилизирра. Сунела санигIят хIясибли ил сеналра мезличил, культураличил вархваси хIейалра, виштIахIелил бегIтани уркIилизи минадарибти ВатIайчи, миллатла гIядатуначи ва нешла мезличи диги гьарил баркьудилизир дагьардулхъули сари. Илкьяйда хIедикIес хIедирехIе нуша, сенахIенну нушала газета гIеббурцутазивад, яшавла шуртIри гIяштас ил къулбасбирутазивад ца сай ГIусман Шамильевич. ХIера, гьалабван бетерхурси даргала диктант дураберкIахъесра илини кумекбарибсири. Илдигъунти баркьудлуми ахIену ишбархIила жагьилтасра гIибратли детарути.
Буралли, ГIусман Булатовли жигарла бутIакьяндеш дирули сари республикала политикала ва жамигIятла гIямрулизир. Илала бузерила гьуни дебали бягIуси саби. Газета бучIантанира иличила балули бургар нушала социальный сетаназирти бяхIяназибадра (Иличибли багьесли саби ишхIелла манзилла тIалабуни ункъли иргъули, илини сагадешуни гIямрулизир жигарчерли пайдаладирниличила). ХIебиалли, ишаб нушани иличила гьанхIебуршехIе.
ГIусман Шамильевич газетала шайзивад акIубси бархIиличил уркIи-уркIилавад мубараквирулра, ва дузахъути къуллукъуначив даим гьалавяхI вашули, сархибдешуни имцIадикIули, пергер хъалибаргличил хIулкIули хIеркайубли дигулра. БахъбикIаб ва берхъаб хIугъунти дарганти!
Нушала корр.
