Дубуртар Улкала лерилра шими тарихла, культурала, жявхIелила гIядатунала хазна сари дикIахIелра, хатIа бетхIерар. СенахIенну илар гьаннара дузахъули лерар нушала хала бегIтала дурхъати гIядатуни.
Шимазир чедаэс имканбикIур тамашала тIабигIятла памятникуни, чулира республикала тарихлизиб хасси мер бурцути. Илкьяйдали шими миллатла культурала анкъурбира сари, илхIелира гьарилличи хасси культурала дегIти. Илдигъунти дурхъадешуначил давлачертихIели нушани халаси пахруличил бурули дирехIе чидил шила вакил саррал.
ХIера, ишди бурхIназив нушала редакциялизи улкала тах шагьарлизивад гIяхIладли вакIиб «Москва-24» бикIуси телеканаллизив узуси журналист. Ил нушала дагъистанлан уршиличи мешулири: вяшатIайчил ва сунела куц-кабизличил. Ил пикри марбариб бархкьябанира. Сунечила бурахъес тиладибарибхIели, Николайли (илис Николай бикIулри) сай секьяйдали телеканаллизив вагьаривиубсирил аргъахъиб. Ил урусла шилизивадси жагьил уршили увухъун. Иличила бакьибси нушала рархкья итмаданал рикIар: «ХIура, нуша лерилра кьяйдали, шилизивадси уилригу?» Илини илкьяйда бурибсири аслу-мина хIясиблира нушагъуна виъниличи пахрубирули.
Буралли, нушани чебиулра шагьарлизиб акIубли, халабаибти адамтани хала бегIтала гIядатуни сегъунти дирутил хъумкартули, нешла мез бекIлил хIедалули. Шимазибад бузес багьандан шагьарлизи гечбиубтани биалли, чули бируси тяхIярлилра гIядатуни дузахъес къайгъибирули саби. ГьатIира гIяхIил дагьардулхъули дирар цали цала хIурматбирнила къиликъунира. Шимазиб жявхIейчибад халатала халаси хIурмат бирусири ва илди хIерудиличил алавбурцутири. Халатани бурибси, гъай агарли бирес хIяжатсири. Шимазибад шагьарлизи бакIибти ишхIелила жагьилтанира илди гIядатуни даимдирни дигеси саби.
ГIямрула аги-кьяйдали шагьарлизи баахъили хьалли, бахъалгъунти халабетаибхIели, шимази чарбулхъули бирар, паргъатли, дахъал тIама-гьама агарли хIербиэс багьандан. Аслу-минала мер-мусаличибад сецад тяйдили хIербиралра, вегI акIубси ва халаваибси шиличила, шантачила, тарихла ва культурала дурхъаси анкъиличила чилилра хъуммартаб!
Салимат ГIялиева
