1920-ибил дусличивад КПСС-ла член, партияла ХIV-ибил съездла делегат, дахъал хIянчи дарибси пенсионер сайри МяхIяммад ИмангIялиев.

ЧебяхIси ВатIа дергъла бутIакьянчи МяхIяммад ИмангIялиев акIубсири 1885 ибил дуслизив Ахъушала районна  Гъуладтимахьилизив мискин хъубзарла хъалибарглизив. Хъалибарг мискинни хIербирни багьандан,  илис 15 дусла гIямруличив унраличибси Убекила шилизибадти давлачебтачив, Къизларла унхъразив узес чебуркъубсири.

Ил 1914-1919-ибти дусмазив Таганроглизив,  Макеевхъала заводлизив  ялчили узусири.

Илавад чарухъи, МяхIяммад ИмангIялиевли 1919-1920-ибти дусмазиб  Дагъистайзиб Совет хIукумат кабизахъес багьанданси  дявилизир жигарла бутIакьяндеш дарибтири. Илди бутIакьяндеш багьандан ДагъЦикла Грамоталичилра шабагъатлавариб. 1920-ибил дусличивад  вехIихьили,  1957 ибил дусличи бикайчи  МяхIяммад ИмангIялиев  Лавашала, Сергокъалала,  Хайдакьла, Дахадаевла, Ахъушала районтазив милицияла начальникла, халкьла судла председательла, прокурорла, райисполкомла председательла  къуллукъуначив узули  калун.

Сай сегъуна хIянчиличив узули калун виалра, МяхIяммад ИмангIялиев хIялалли ва бамсриагарли узусири. Илини гьар-чинабалра гьалмагъуни бургутири ва лебилра халкьли илала хIурматбирусири.

МяхIяммад ИмангIялиевла хIянчи пачалихълира чихъли кьиматлабарибсири. Ил «Бузерилизив декIарухъни багьандан», «Кавказ батахъни багьандан» ва «1941-1945-ибти дусмала ВатIа дергъла манзиллизиб асилси бузери багьандан» медальтачил шабагъатлаварибсири.

Иш белкI хIядурбарес багьандан баянти касибти сари 1964 ибил дусла июньна 20-личиб дурабухъунси «Ленинна байрахъ» бикIуси газетализирад. Ил газетализибси белкI бархьибси Ахъушала урга даражала хIябъибил школала директор ИмангIялиева Марина МяхIяммадовнас баркалла багьахъес дигулра.

С.ГIябдуллаева