Лебтанилра балуливан, гIергъиси замана дебали къиянни саби школабазир дарган мез руркъяхъес. СягIятунала кьадарра дусличи-дус камбирули саби. Бахъалгъунти бегIтира нешал мезличи къаршили кабизурли саби: «Селра хIебирар нешла мез хIедагьаллира, иткъира илди гIягIнихIедиркур, хъа духIнар ахIенси». Илдала пикрили, чула дурхIнани урусла мез далули сари, гIямрулизир биалли илдас нешла мез багалахIeдирар.

Илдигъунти шуртIразиб бузесра учительтас гьайгьайрагу, гьамадли ахIен. Дила пикрили, бегI гьалар дурхIнази нешла мез дагьахъес гIягIнити сари. ДурхIназир нешла мезличи, вегIла ВатIайчи, культураличи, гIядатуначи диги адикьес чебиркур. ЦацабехIти дурхIни-ургаб, даршлизивад ца дурхIя ургар гьарли-марли дарган  мез далуси, гъайикIес балуси. Расул ХIямзатовла гъай, гьайгьайрагу, дархьтили чедиулра. «Нагагьладан жягIял дила мез детихъули диалли, иш ну хIядурли сайра ишбархIил хIябла кархес». Гьанна ну, Дагъиста Пачалихъла университетла студентка пикририкIулра, се баралли гIяхIсил вегIла мезличи, миллатличи диги адикьес багьандан.

АхIeрти дурхIни, дигахъеная нешла мез! Нешла мез мицIирли кавлан, дурхIни нешла мезличил хъулибалра гъайбикIули биалли. Даширая, хала бегIтани нушаб букьурлис датурти нешла мез, ва гIядатуни мяхIкамдирехIену…

Карина БяхIмудова, ДГУ-ла филологияла факультетла журналистикала отделениела магистратурала 1-ибил курсла студентка