Гьар хIебла манзил нуни гIядатлибиубливан, багьахънибазибад вайси хабар иргъулра – «ДурхIя улкьайлавад кайкили сай» ибси. Хабар бакьили гIергъи чумилра адамла гIямру дукьдуун дургар , иличи че бегIтала сагъхIебируси дяхъи, гьаннара чучи жавабти агарти суалти.
Нуни дила макьалализиб гIямрулизиб къаршихIебиркуси сегъуна-биалра ца вайси анцIбукьличила бурули ахIенра. Гьанбушибси бехIемцI гьар дус, бара ванабирухIели тикрарбирули бирар. Бара гIямруличил тянишбирес бехIбихьибти биштIати, сабира бегIтала гIяйибличибли бубкIули саби. «БегIтачиб се гIяйиб леба?» или гьанбиркули бургар хIушаб. Амма… Илди чула диру-далтутази абархили, биштIатачи лайикьси хIеруди бирули ахIен. Гьаннала замана кьалли, хаслира бегIти имцIаливан телефонтази кабиили, саби-алав се кабиркулилра пикри бяхIчииули ахIен. ХIера, илдани илкьяйдали улкьайти гьаргли далтули сари. Ила сен-биалра дурхIни абицIули саби ва хъисхъала душигъуна, кункси ва жибинти ахIедицIахъес баршибси (москитный) сеткаличи хъарихъули саби. Илгъуна агилизиб баягъи сетка биштIатас хасси тяхIярла тIимкьли бетарули саби.
Нушала шагьарлизирра жагьилти-ургар илдигъунти чумал анцIбукь диуб. ЦацабехIти саби гIяхIъулали, гIямру дитIили тIяхIбулхъутира къаршибиркули саби, яра бержибхIели къагъбиубли илабад кабиркути, хабарагарли улкьайла шиша ицухIели кьяш хIусбухъи, ва цархIилтира.
Гьаларван, нушала шагьарлизир чумал анцIбукь кадикибтири, илдазирад кIиличила ишабра гьанбуршис. ВиштIаси дурхIя хъулив хIязтавиркьули сай или, неш шакдеш агарли мякьлабси хъули кариили, телефоннизи рархили руили сари. ВиштIаси уршила шагьар чебаэс иштяхI акIубли, ил уталичивад столличи ацIили, илавадли улкьайла удибси кьасиличи кайрули сай. Жибинти хъули ахIедацIахъес кабатурси сеткали ну уцахъура или, ил хъарихьун. Ил сеткара, сайра урехиличил ва дунъя чебиргъахъути бисаличил дахъал дерхIаначилси, ахъси юртлизивад уди каркули сай. Уршила тIама аргъибхIели, неш мякьлабси хъули арацIиб, амма урши чехIеили хъярхъли гьаргала дурарухъун. Азбарлабтани «къалабаси кумек»-ла машина жибарилри ва камси заманала бухIнаб ил бехIемцIла мерличи баилри. Ил замана урши мицIирли левалри. Тухтурти урши верцахъес гъазализибри, амма илдалара ахъри аги илдигъунти аги-кьяйда дарсдарес. Больницализи ваайчи ил таманкайубсири. Ил анцIбукьлизиб бегIлара децIагеси нешли сунечибси гIяйиб чехIебиъни сабри.
ЦархIил хабар. Дурсрачивад сунела юлдашуначил чарулхъуси уршили ахъси дерхIаначилси юртлизиб улкьайла дубличи вархибси урши чеили сай, итмадан ил улкьайла уди дуцIухъун. Алав-гьалав башутани кумекбаресила мерличиб чула дурхъати телефонти касили чебиуси сурат кайсули буилри.
— Гьуя, хIераягу ца икI уршиличи. Илала бегIти чина хIербикIулив. Чилра агарсив илдала хъулив, — ибти тIама-гьама дикьулри.
— ЦIахдеш, икI уршила бегIтани, урши варкьили хьалли, иличи хIерудибарес балули ахIен!
Илкьяйдали бикIути адамти цархIил секIайчила пикрибулхъули ахIенри, рахли баягъи уршила бегIти хIянчилабли рухъна хала нешличил ургар или. Гьар секIайзиб бегIти гIяйиблабирули саби.
Итмадан улкьайла дубличи суркавхъунси уршили някъ баткаиб ва хъярхъли ил удив тIашсила някълизи викиб. ИлхIели иличи лебилра дуцIбухъун. Хъярхъли «къалабаси кумек»-ла машина жибариб. БакIибти тухтуртани урши арали сай или багьахъур, амма някъ ва кьяш дячири.
Улкьайлавад урши кайкибси замана уршила бегIти хIянчилабли уббухъун. Илдани чула урши верцахънила хабар аргъибхIели, верцахъибсилис рушбат бедибсири, республикала шайзивадра виштIаси верцахъибси шабагъатлаварибсири.
ХIурматла бегIти, дурхIни сабицун хъулиб мабалтадая. ДурхIни лебси хъулибси улкьай гIекая. Улкьайла мякьларти секIал урасая ва илизи улкьайличи ацIес асухIебирниличила аргъахъая. Гьар замана «урши гьанна каркур, гIур каркур» или кабиили, удив чилра хIерли хIейрарну. Арали батаб хIушала дурхIни.
МяхIяммадшапи Матаев
