ГIергъиси замана дубурла шимазир адамтала гIямрула ва яшавла шуртIри къулайдирахъни дигеси анцIбукь саби. Улкали халкьлис багаладиэсти программаби дузахънира гапличи лайикьси баркьуди саби. Илкьяйдали гьундури ремонтдирнила, адамтани бамсриахъес багьандан гIяхIти шуртIри дирнила ва цархIилти къулайдешуни алкIахънила баркьудлуми имцIадикIули сари Дахадаевла районна шимазирра. Районна руководствора къайгъилизиб саби шимазибти адамти дурала мер-мусаличи архIебашахъес багьандан гIяхIти шуртIри алкIахъес. Камли ахIен шимала халкьли чула цIакьаначил алкIахъути къулайдешунира.

Ишди бурхIназибра Уркухъла шилизибси «КутIа лак» бикIуси мерличибси гIиниз къулайси агиличи биркахънила баркьудилизир гIяхIцад адамтани бутIакьяндеш дариб. Ил гIиниз гьанна 3-4 дусцадхIи шин агниличибли вайси даражаличи бетикилри. Райсат НухIкьадиевани бекIдеш дирнила удиб уркухъантани ил гIинизлизи шин кес кьасбариб. Ил гIяхIбаркь гIеббуциб МяхIяммад НухIкьадиевли, илала гIямрула рархкья Людмила НухIкьадиевани (илини бузути адамти берклумачил гIеббурцутири), Рабазан Ражабовли, Ибрагьим ХIяжиевли, ГIябдулхIяпиз ГIябдулхIяпизовли, Казим Пирбудагъовли, Мирза Мирзаевли, ХIябибуллагь Камаловли, Имин Шамхаловли, Залимхан ГIямаровли, Шамил Мирзаевли, Мухлисат ХIясановани. Илдани шушел азир къуруш арцла цаладяхъиб ва Дербентлизирадли турбаби хили, ил гIинизлизи шин киб. 10 бархIи гъазализи кабизурли, илдани лерил хIянчи гьунчидикахъиб. Гьанна адамтасра мицIираглисра даарила кьадарлизир умути шин лер ил гIинизлизир.

Илгъуна пайдаласи баркьуди дураберкIибтас бахъли баркаллара балахъули саби.

ПатIимат Кьурбанова