ХIясбуллагь Рабазанович МяхIяммадов КьярбачIимахьилизибадти бегIтала урши МяхIячкъалализив акIубли, халаваибси сай. Илала дудеш Рабазан МяхIяммадович МяхIяммадов МяхIячкъалала Финансовый Колледжла директорла заместительли, заочное отделениела заведующийли, преподавательли дахъал дусмазив узули сай. Сай узуси мерличив халаси хIурмат-кьиматличил пайдалаикIули сай.
ХIясбуллагь Рабазановичли ДГУ-ла экономикала факультет таманбарибсири ва МяхIячкъала шагьарла Администрациялизив узулри.
2024 ибил дусла хIеблизив, саби гIяхIъулали ВатIа дазуличиб бургъес аркьутала Дагъиста батальоннизи уцахъес дугьаизурсири. ХIясбуллагь Рабазанович, СВО-ла дазуличив къуллукъбирули урегал баз калун, сагаси дус бехIбирхьухIели ара-сагъли, хъули чарухъун. Ил бегIтас, тухумтас, шантас халаси разидеш сабри.
Ишди бурхIназив ХIясбуллагь Рабазанович республикала «Замана» газетала редакциялизи гIяхIладли вакIиб ва СВО-ла дазуличир детаурти, сай бикьрили виубти анцIбукьуначила хабурти дуриб. Газетала хIянчизартала илизи хьардаэс дахъал суалтира лерри. Илини нушала суалтас сунени далутачила, чедаибтачила ихтилатикIули, дархьти жавабтира чардариб.
«Саби гIяхIъулали бургъес аркьути, лебилра цагъунти гIярмицуни сабливан (рядовые) кьабулбирути саби. Нушала батальоннизибра илкьяйдали сабри. БегI гьалабси яргализир, бяхъибтас кумекбарахъес, укол барахъес, хIи тIашаахъес, дяхъи бигьахъес бурсидарира нуша.
Дазуличи детаибхIели, цаибил бархIи, селра хIергъули калунра. Ила аркьухIели, хIярхIуби кахIедалтуси хасси жилет, бекIличи шанда кьапIа, автомат, илис хIяжатдиркути хIярхIуби, чумал бархIилис беркеси, держес шин дарх кайсутири. Илкьяйда аркьути нушачидяхI, арцурли кIел дрон ляркьулри. Ил бархIил, илар нуша кадушес асубири, сенахIенну дронти кадикахъес, илдазирад дерцес, нуша хIядурли ахIенри. Нушаб кумекбариб, илав валикибси вахъхIила ургъанни, илини кIелра дрон нушачи сахIедаахъили гьаваличир лерай даргргдердахъиб. Илала у бурули ахIенра, сенахIенну илдигъунти игитуни итаб бахъал теб.
Хурегличила хьарбиадалли бурис, ишарад аркьули лерай, нушачил варх левсири, лебтасалра хурег барес сунечи чесибси, Дербентлизибси ресторанна шеф-повар. Илини, лебилра замана, бизити хурегунани далхули калунра, нушани илис гIягIнисигъуна кумекра гIеббиахъусири.
Дагъистайзибадти саби гIяхIъулали бургъес аркьутала батальон лерил хIяжатти секIайчил республикала БекIли гIеббурцуси саби. Бурес чебиркур нуша лерил секIайчил беркесиличил, палтарличил, хIяжатдиркути дахъал гIягIниахълумачил хIяжатси тяхIярли гIердуцилри.
ХIуша дикIуси бархьси саби, — нушала суайс ХIясбуллагьли гIергъити гъай жавабли диахъуб, — Дагъиста бургъантани чус че-умиван (позывные) чула районтала, шимала, мер-мусала уми кайсули сари. Дила че у биалли, (Хезбалла) сабри.
Нушала батальонна командир Табир Сакитович Маликов сайри. Илини бургъанти миллат хIясибли декIар-декIарти отделениебази буртIутири ва чула ургаб бархбас хIяжатбикибхIели, къаршикартани хIергъесли, нешла мезли гъайбикIахъес хъарбирусири. Комбат хабарла гIяхIгъабза сайри, илала гъабзадешличила, бургъантас бедлугуси бяркъличила, илала бугаси гIякьлуличила, дявила майдайчир дузахъути дархьти далдуцуначила сецад-дигара хабурти дурес вирар. Нушала батальоннизибад, я вяхъибси, я кавшибси дявила майдайчив вархьватес асубируси ахIенри. Сай улхули виалра, юлдаш верцахъес хъарбирусири командирли.
«Урухдиубли гьардухъадалли хIуша нуни кадуршура, дявила аги-кьяйдализиб набчи чилилра гIяйибхIебиру, я такьсир кахIебилзахъа. Ил багьандан, хIушаб урухдиэс ихтияр агара», — викIусири батальонна командир. Гьай-гьайрагу илини чилра кахIевшиб, амма лебилра бургъанти, цIархIилтала гьалаб саби урузхIебиэсти, гIяхIгъубзни бетаахъур.
Нушала командир гьачамалра штаблизи кайили ууси ахIенри, ил дазула бегIлара гьаларти мер-мусаличив вири, цалра ургъан сунела гIелав ватурли, дергъла майдайчивад архIеши. Илгъуна гIибрат командирли чебиахъухIели, лебилра бургъантани, чулаван юлдашуналара гIямру ахIерадирутири ва чедибдеш сархусири. Лебилра Дагъиста бургъанти, итаб цалиc цали кумекбирниличил, юлдаш багьандан чула жан дедес хIядурли биъниличил, декIарбулхъули саби.
Бургъантачи, дахъал гьунгелтачил, гIяхIладли башулри Дагъиста районтас, шимас гьуни чебиахъути, учреждениебас ва организациябас гьуни чебиахъути хIякимти. Илкьяйдали нушачи вакIиб Къаякентла районна администрацияла бекI МяхIяммад Эльдерханов, далайчи Заира ГIямарова ва цархIилтира.
Ургъайс, кьацIличил дарх, уркIилизибси кьас, гъира, бирхауди диэс гIягIнити сари. Дагъиста муфтиятли халаси кумек бирулри, илдани бургъантала уркIби паргъатдирулри, бургъанти гIяхIдешличи хьулбикIахъулри, мавлидуни, ихтилатуни дурадуркIулри, балга-дугIя дирулри. Дявила дазуличиб илди бургъантачил барх сабри, чула гIибратличил бургъанти уркIичеббирулри.
Итар дебали тамашалати, дахъал анцIбукьуни кадиркулри. Арцурли тупла хIярхIя лябкьули саби, хIера, их нушала ахир лябкьули, гьанна берцуди агара или гьанбикибхIели, дяхIилизи кабикили, хIярхIя баргхIебердили кавлулри.
Дроннизивадра гьавухъес хIейрар. Илини сягIятли 140 километр ихъули саби. УруххIейубли, ил кабикахъес, яра биргIябиргес гIягIнили саби.
Афганиста, Чечентачилти, Африкализирти дургъбала бутIакьянчибани гьаннала дергълизиб селра аргъес бирули ахIен. СВО-лизибси дергълизив къаршикар чеваэс агара, амма чинабалра паргъатдеш агара. Сегъуна-дигара манзил, чинабад сабил аргъес бекIхIейубли, тупла хIярхIуби, даргудути минаби, дронти садашули сари. Мурталра сахъдешлизив виэс гIягIнили саби.
ХIейгеси биалра, детахълумира детарули сари. Цаибил бархIи нуша дронтазирад дерцахъибси ургъан, хIярхIуби кахIедалтуси хасси жилет чегьурли виалра, шайзибад минала бургIяла чегили вяхъиб, верцахъес хIедиубра.
Дархьибти гьунгелтачил барх ца школала гIямрула рурсила кагъар лебри, абхьибхIели илар 200 къуруш даргира. Лерилра гьунгелтачирра риштIаси рурсила 200 къуруш нушаб дурхъали кабилзулри.
Илкьяйдали лебилра улкалира, халкьлира СВО-ла дазуличибти бургъанти гIеббурцули саби.
Нуни вягIда бигьунси къуллукъ бируси замана, СВО-ла дазуличив ургъули калунра. Отделениела командир ветаурра. Отделениелизиб 8 адам лебри. ГIур ну штаблизи шурватурра. Илар халати жавабкардеш дихути масъулти арзес гIягIнитири. Наб гибти хъарбаркьуни чедибдешличил детерхахъурра.
Чариубли гIергъи патриот бяркъличил дархдасунти далдуцуназир бутIакьяндеш дирулра. Школала бучIантачил, ургабси даражала, хасси багьуди бедлугути учреждениебала бучIантачил, студентуначил, журналистуначил гьунивиулра.
Дила хала дудеш ГIяллай ГIусманов Ленинградла блокада гьарасес багьандан ургъули калунси сай. Илала сурат някъбазибли Майла 9-ибил ЧебяхIси Чедибдешла бархIила далдуцуназир бутIакьяндеш дарира.
Дила неш Разият ГIяллаевнасван, цархIилти нешанасра чула дурхIни ахIерти биъни балулра, итаб бургъули калунтачил бархбас къябудахъули ахIенра, нешанала тилади хIясибли, итабти бургъантази, бахъхIи чучила хабар-тIама агарти уршбачила се-биалра балулил хьарикIулра. Илди баргибхIели, бегIтачил бархбасуни кадилзахъулра. Ил шайчиб, лебилра итабти бургъантани кумекбирули саби.
Ахирлизиб биалли, СВО-ла бутIакьянчибас лайикьси кумек гIеббаахъес кумеклидирути дахъал хIукмурти цIакьлизи кахIедерхурли, гъайлизир лералниличилара бурес дигулра. Ил шайчиб хIукмурти кьабулдирутала бузери жигарчеббарес лайикьли саби.
Ишди бурхIназив, даршудеш кабизахъниличила вягIдурти кьабулдирниличи хьуликIулра. Дургъбачибра даршудеш даршнали дигеси саби. Итабти бургъантани кабирхьуси къиян даршудешличи бяхIчиаалли, ташмишдеш агарли, дунъя вавалибяхъяхъес вирар.
Муъминат Хаттаева
