ЧебяхI Мулеб­кIи­ла ши­ли­зибадти Че­бяхI­си ВатIа дергъла ман­­зил­лизиб тыл­ли­зиб бу­зули калунти Мус­тапаев ХIясан ГIяб­дул­кьа­дирович акIубсири 1928 ибил дуслизив, Макаев Мя­хIям­мадрасул Кьур­банович акIуб­сири 1930 ибил дус­лизив.
Ил­ди кIелра мурул адам дявила ман­­зил­ли­зиб 11-13 дус биубти дурхIни саб­ри. БиштIати биаллира илдани халаси бузерила пай кабихьиб Че­бяхIси Чедибдеш сархнилизи: хандакьуни укъули, хъуми делгIули, ми­цIираг адилкьу­ли, бегIтас кумек­бикIули.
Дергълис гIергъити къиянти дусми сарри, халкьлис дахъал къияндешуни дяхIяэс чебуркъуб­сири. ХIясан Мустапаев ва МяхIям­мадрасул Макаев колхозлизиб бузутири, машинаби дикули, чули барес бирусигъуна хIянчи бирули.
Илдала бузери кьиматлабарили, хIукуматла шайзибад илди шабагъатуначи ва «Тылла ветеран» бикIуси уличи лайикьбикиб.
ХIясан Мустапаевли илди къиянти дусмазив хъаллавиубли сунела гIямрула рархкьячил барх авал урши-рурси абикьур. МяхIям­мадрасул Макаевли урчIемал урши-рурси абикьур, гIяхIси бяркъра бедили, багьудира касахъили, бузери кьиматлабирахъесра бурсибарили, гIямрула бягIуси дякьличи дураиб
Илдас чIумаси арадеш биаб, чула дурхIнани ва илдачибад акIубтани разибирули хIербиэс кьадарбиаб чус!

***

Усишала шили­зи­рад­си ГIяб­дул­лаева Па­тIи­мат Су­лай­ба­нов­­на акIубси сари 1932 ибил дус­­лизир, гIядатла хъа­­ли­барглизир.

ПатIиматла бегIти кол­хозлизиб бузутири. БегI­тани Па­тIи­мат гIяхI­си бяркъра бе­дили арикьурсири. ЧебяхIси ВатIа дергъ бехI­би­хьиб­хIе­ли Па­тIимат камти гIям­рула рурси сарри. Илкьяйда биаллира, Па­тIи­мат ­халати адамтачил рарх рузули ­калунсири.
ПатIиматли багьудира касиб, бехIбихьудла классуни та­­ман­дарили. ГIур чумал дус, су­нела гIямрула вархкьячил Кал­­­мыкиялизир ва ­Ставропольла крайлизир хIеррирули, ми­­цIи­раг адилкьули рузули калун. Хъу­ли чаррухъунхIелира Па­тIи­­мат акьули кахIерииб, хъуми дел­­гIули, мицIираг адилкьули рузусири. ХIябал урши-рурси абикьур, гIяхIси бяркъра бе­­дили, гIяхIсилара вайсилара мягI­­нара аргъахъили, гIямрула гьунчи дураиб.
ЧебяхIси Чедибдеш гъамбиахъес багьандан къиянти дусмазиб бузерила пай кабихьнилис, П.ГIябдул­лаева чу­мал шабагъатличи лайикь­ри­киб, «Тылла ветеран» би­кIу­си ура касиб.
П.ГIябдуллаева, ­РФ-ла Пре­зидент В.Путинна 2024 ибил дусла сентябрьла 2-личиб дурабухъунси ХIукму хIясибли, ЧебяхIси Ва­тIа дергъла замана тылли­зиб бузули, халаси бузери барибти, хандакьуни адилтIули калунти цархIилти адамти кьяйдали, «1941-1945-ибти дусмазиб ЧебяхIси Ва­тIа дергълизиб чедибдеш сар­хиб­хIей­чирад – 80 дус» бикIуси медальличил шабагъатларариб.
ПатIимат гьанна хIеррирули сари Усишала шилизир, сунела ­гъамтачил рарх, диги­личил ва хIерудиличил алавруцили. Сунела дигутани разирирули, хIерриэс кьадарбиаб гьаннала гIергъира илис.

Сабият Г|ябдуллаева