Инсаниятла тарихлизир, чум дус ардукьяллира, хъумхlертути анцlбукьуни лерти сари. Илдигъунтазибад цали бетарули саби — Чебяхlси Ватlа дергъ.

1941-1945 — ибти кьяркьти дусми улкала халкьла гьанбикуназир даимлис кавлан. Халаси-виштlаси хlеили, хьунул адамти, мурул адамти, хала дудешуни ва жагьилти Чедибдеш сархес бузутири. Хlера, ишдус ил дергълизиб Чедибдеш сархибхlейчирад 80 дус дикили сари. Россияла лерилра регионтазиб ва субъектуназиб Чедибдешла юбилей бетерхур.Нушала республикализибра халаси шадлихъ дураберкlиб. Даргала районтазирра Чебяхlси Чедибдешлис хасдарибти дахъал далдуцуни детерхур.

Ахъушала районнизиб дергълизиб алхунтас хасбарибси памятник ибхьниличил шадлихъ бехlбихьиб ва цархlилти далдуцуначил ил даимбиуб.

Дахадаевла районнизиб Чебяхlси Чедибдешлис хасбарибси шадлихъ Уркухъла шилизиб бехlбихьиб. Дявила асилдешлис хасбарибси Зильбачила шилизибси памятник ил бархlилис сагабарили балкьаахъур. «Бебкlаагарси полк» бикlуси балбуцла дазурбазиб башри дураберкlиб, памятникличи вавни кадихьиб, алхунтала хlурматлис минутла лехlдеш багьахъур, школала бучlантани районна игитунас хасдарибти назмурти делчlун.

Лавашала районна администрацияла ва лерилра учреждениебала хlянчизартани шадлихълизир бутlакьяндеш дариб. Чебяхlси Ватlа дергълизиб алхунти гьанбикахъиб ва илдала хlурматбариб.

Сергокъалала районна администрацияра Чебяхlси Чедибдешличи жагали хlядурбиублири. Районнизиб Чедибдешла парад бетерхур, «Бебкlаагарси полк»- ла башри дураберкlиб, дергълизиб ва дявила хасси балбуцлизир бут|акьяндеш дирули алхунтала хlурматлис тlашдатурти памятникуначи вавни кадихьиб.

Ахlерти дагъистанланти, россияланти, Чедибдешла байрамличил уркlи-уркlиларад мубаракдирулрая. Даршуси заклиур хlулкlули хlердиабая. Чум дус ардукьяллира, Чедибдеш сархибтала игитдешла баркьудлуми хъумартес асухlебирар. Чеалкlуси наслуличи тарихла бяхlяни даахъни — нушала чебла саби.

 Патlимат Шахова