МухIела шилизибадти ПатIимат ва Рукьият ДаудхIя­жие­вахъали акIубти саби гIядатла хъалибарглизиб. Па­тIимат акIубси сари 1926 ибил дуслизир, Рукьият – 1930 ибил дуслизир.
ПатIиматли ва Рукьиятли ЧебяхIси ВатIа дявила дусмазир бахъал цархIилтани кьяйдали, гIяхIцад къиян-жапа дяхIяур. Илдала дурхIядешла гIямру гашала дусмала манзиллизир детаур. ИтхIели биштIатала дурхIядеш жявли кадерхуртири: дявила дусмазиб илдас халати адамтачил цугли бузес чебуркъибсири.
Дергълис гIергъити дусмазибра ПатIимат ва Рукьият колхозлизиб бузули, халаси бузери бариб. МалхIямти, духути, дигичебти, уркIи-хIял гIяхIти хьунул адамти саби илди. Хъуми делгIули, газаладирули, сабухъ бурчули, арши иршули, мицIираг адилкьули, кьули изули бири илдани. Чула шила халкьла ургаб илди хьунул адамтани халаси хIурмат сархиб. ПатIимат ва Рукьият «Тылла ветеран» бикIуси уличи лайикьбикиб.
ПатIиматли урегал, Рукьиятли верхIел урши-рурси абикьур, гIяхIси бяркъра бедили, багьудира касахъили, жавабкарти бетаахъурли, адамтала хIурмат-хатир дирахъес бурсибарили, гIямрула гьунчи дураиб.
ПатIимат ва Рукьият «1941-1945-ибти дусмала асилси бузери багьандан» бикIути медальтачира лайикьбикили саби.
Ишдусла февраль базличир ПатIимат Даудовна, Россияла Президент В.В.Путинна 2024 ибил дусла сентябрьла 2-личиб дурабухъунси ХIукму хIясибли, «1941-1945-ибти дусмала ЧебяхIси ВатIа дергълизиб Чедибдеш сархибхIейчирад — 80 дус» бикIуси юбилейный медальличил шабагъатларариб.
Илди чула баркьибтани, илдачибад акIубтани разибирули хIербиэс кьадарбиаб.

***

Ахъушала шила Хъаршамахьилизир лер хIеррируси Ражабова ГIяйшат Ражабовна акIубси сари 1931 ибил дуслизир хIурматла хъалибарглизир.                                                     ГIяйшатла дурхIядеш къаршидикиб къиянти дергъла дусмазир. Ил багьандан камти гIямрула рурсилис халатачил рарх рузес чебуркъиб. ГIяйшат ит манзилла гIулухъаби, дурхIни кьяйдали хандакьуни икъули калунсири. Ил дергълис гIергъити гаши-дягIила дусмазирра хъуми делгIули, сабухъ бурчули, арши иршули, мицIираг адилкьули рузусири.
ГIяйшатли Хъаршамахьилизив хIерируси ГIябдуллагьличил кьисмат цабариб. Сунела гIямрула вархкьячил ГIяйшатли верхIел уршира ца рурсира абикьур. ДурхIни абикьес багьандан ГIяйшатли ва ГIябдуллагьли дахъал хIянчи дариб. ГIяйшатли колхозлизирра, совхозлизирра, Ногъайла районнизир мицIирагличи хIеруди бирули, авлахъла хIянчи бекIдирули, халаси бузери бариб.
ГIяйшат Ражабова хъули чарбухъи гIергъи, Хъаршала школализир технический хIянчизарли ва завхозли рузулира калун.
Лебилра уршбази ва рурсилизи багьуди касахъиб, гIяхIси бяркъра бедили сабигъунти бузери дигутили халабаахъили, гIямрула дякьличи дураиб.
ГIяйшатла рурси Зубайдат ГIябдуллаевна духуси, малхIямси, жагаси хьунул адам сари, дахъал дусми финотделлизир, хIурматличил рузули сари.
Ца урши ЗубайрухIяжи ГIябдуллаевич бухгалтерли узули сай.
ГIяйшат Ражабовала леб «ЧебяхIси ВатIа дявила ветеран» бикIуси удостоверение, «Тылла ветеран» бикIуси уличи ва гIурра дахъал медальтачи ва цархIилти шабагъатуначи лайикьрикили сари ил.
ГIяйшат Ражабова, Россияла Федерацияла Президент В.В.Путинна 2024 ибил дусла сентябрьла 2-личиб дурабухъунси Указ хIясибли, ЧебяхIси ВатIа дявила замана тыллизиб бузули, халаси бузери барибти, хандакьуни икъули калунти цархIилтира адамти кьяйдали «1941-1945-ибти дусмала ЧебяхIси ВатIа дергълизиб чедибдеш сархибхIейчирад – 80 дус» бикIуси медальличил шабагъатларариб.
ГIяйшат хIеррирули сари сунела шилизир дурхIначил, илдачибад акIубтачил рарх, дигиличил ва халаси хIерудиличил алавруцили. Сунела дигутани разирирули хIерриэс кьадарбиаб гьаннала гIергъира!

***

МухIела ши­ли­­зирадси ШяхI­ба­нова Жуу ХIя­сан­гIя­лиевна акIубси сари 1929 ибил дуслизир гIядатла хъа­либарглизир.

ЧебяхIси ВатIа дергъла дусмазир Жуу ШяхIбанова камти гIямрула рурси сарри, амма ил халати адамтачил цугли рузули калун тыллизир детурхути хIянчилизир, хандакьуни хIядурдирули. Дявила гIергъити дусмазирра колхозлизир рузули, илини дахъал хIянчи дариб: хъуми делгIули, мицIираг адилкьули, сабухъ бурчули, арши иршули.
Сецад къиянти бархIи-дуги дакIиб диалра, илди дусмазиб хIербирути гIяхIгъабза адамтани, бахъал дурхIни аби­кьур. Илкьяйдали Ж.ШяхI­банованира уре­гал урши-рурси гIяхIси бяр­къра бедили, багьудира ка­са­хъили, гIямрула гьунчи дураиб. Духуси, малхIямси, черетаибси, уркIи-хIял гIяхIси Жуу ХIя­­сангIялиевнани ва илала хъалибаргли МухIела шилизиб халаси хIурмат сархили саби. Илала дурхIнани, чинаб бузули кали биалра, чучи хъарси хIянчи жавабкардешличил бирули, халкьла баркаллаличи лайикьбикили саби.
Жуу ШяхIбанова «Тылла ве­­теран» бикIуси уличи лайкьрикили сари. Пачалихълира илала бузери пикрила дураб хIебатур, «1941-1945-ибти дус­мала асилси бузери багьандан» бикIуси ва цархIилтира Че­бяхIси Чедибдешлис хасдарибти юбилейный медальтачил шабагъатларариб.
Ишдусла февральличир Жуу ХIясангIялиевна Россияла Президент Владимир Влади­ми­рович 2024 ибил дусла сентябрьла 2-личиб дурабухъунси Указ хIясибли «1941-1945-ибти дусмала ЧебяхIси Ва­тIа дергълизиб Чедибдеш сар­хиб­хIейчирад — 80 дус» бикIуси медальличил шабагъатларарили сари.
Жуу ШяхIбанова гьанна бу­сягIят сунела рурсиличир Дон­ничибси Ростовла область­лизирти мер-мусаличир хIер­ри­рули сари.
ЧIумаси арадеш биаб, сунела дигутани разирирули хIерриэс кьадарбиаб илис!
МухIела шилизибти дергъла дусмазиб бузери ба­рибти адамтачила белкI хIя­дур­ба­рахъес кумекбарибси Му­хIе­ла шила администрацияла бекI­ла за­меститель ГIяйшат Ч­у­па­но­ва­с баркалла багьахъес дигулра.

БяхI хIядурбарибси — Сабият ГIябдуллаева