БяхIмудкьадиев Жалал ХIясайниевич акIубси сай 1926 ибил дуслизив Ахъушала районна Куркила шилизив, гIядатла хъалибарглизив.
Жалал БяхIмудкьадиевли, сунела бузерила гьуни учительла санигIятличибад бехIбихьиб. Ил ЧебяхIси ВатIа дергъла дусмазив ХIинтIала шилизибси верхIел дусла школализив узес вехIихьибсири. Сайра ил школализив учIули калунсири ва 1941 ибил дуслизиб гIяхI­ти кьиматуначил таманбарибсири. Итди дусмазиб учи­тельти камли биъ­ни багьандан, ил школализив учительли узес ве­хIи­хьиб­сири.
Жалал 1942 ибил дусла февральличив Сергокъалала район­низибси пе­ду­чи­­ли­ще­лизи кер­хур. Серго­къа­лала военкоматлизив Жалал ХIя­сай­ниевичли снайперти руркъути курсани дел­чIун.
1942 ибил дусла август базличиб Ахъу­­шала райис­пол­комла секретарь ГIяб­дулла Нестровли МяхIячкъала ша­гьарлизи 70-цад жа­гьил адам арбукибтири, танкаби шал­гIер­хIедухъахъес багьандан хандакьуни хIядур­да­рахъес. Илдачил варх левсири Жалал ХIясай­ниевичра. Хандакьуни укъули бузули калунтири Дагъистайзибадти 70 азир адам. Хан­дакьунала бухъяндеш леб­сири Мя­хIяч­къалализибад бехIбихьили, Атлыбоюн би­кIуси мерличи бикайчи, Ленинкент поселокла мякьла бетаайчи.
Сентябрь базличив Жалал ХIясайниевич дуцIар-ружерила изайзи викили, хъули чарухъунсири.
Ил сагъвиубли гIергъи 1942 ибил дусличивад 1943 ибил дусличи бикайчи Нах­кила шилизибси школализив узули калун. 1943 ибил дусличивад 1946 ибил дус бикайчи ХIинтIала шилизибси шко­лали­зив узиб.
1947 ибил дусличивад вехIихьили, ца дус Ахъушала шилизибси урга даражала школализибра хIян­чи бариб.
1956 ибил дусла октябрь базличив Жалал ХIя­сай­ниевич сагали дявила комиссариатли живарили, Краснодарский крайлизив хIябал баз дергъличи хIя­дурдеш бирнила шайчирти устадеш гIерисули калун.
1948 дусличивад 1982 ибил дусличи бикайчи Куркила шилизибси бехIбихьудла школализив заведующийли узули калун, 1982 ибил дусличивад ил школала директор варибсири.
1975 ибил дуслизиб илини заочно учIули, филологический факультетра хъараахъурсири.
ХIинтIала ва Куркила шимала жамигIятла гIям­рулизир Жалал ХIясайниевичли жигарла бу­тIакьяндеш дирули, халкьла халаси хIурмат сархиб.
Халкьлис гIяхIси барес къайгъиличил, бархьдеш дигуси, сунечил барх бузутала, бучIантала, илдала бегIтала ургаб халаси хIурмат сархибси, жавабкардешличил, чеветаили, дурхIнази багьуди касахъес бажардилизивси адам сайри Жамал БяхIмудкьадиев.
Ил учительтани секьяйдали дарс кабирхьулил ахтардибирес дурсрачи вашусири, илдас насихIят гIеббурусири, сунени балуси тяхIярличи илдира бурсибирутири.
Жалал ХIясайниевич дахъал шабагъатуначи лайикьвикили сай, «Кавказ батахъни багьандан», «В.Ленин акIубхIейчирад 100 дус дикнилис ва асилси бузери багьандан», «1941-1945-ибти дусмала ЧебяхIси ВатIа дергълизиб сархибси Чедибдешлис — 30 дус», «Бузерила ветеран», «БахъхIила ва бархьси бузери багьандан», «ЧебяхIси ВатIа дергълизиб сархибси Чедибдешлис — 65 дус» бикIути медальтачи, «Победитель соцсоревнования 1974г.» бикIуси ли­шанничи. Гьар дус РФ-ла Президент В.В.Путинна шай­зирад Баркаллала кагъурти ва Чедибдешла Бар­хIи­лис мубаракуни дашули сари Жалал ХIясай­ние­вич­личи.
Илала бекIдешлиуб бузуси бехIбихьудла школа чуйнара гIилмуртала учреждениебала шайзибад ХIурматла Грамотабачи лайикьбикибсири, чеалкIуси наслулис гIяхIси бяркъ бедлугнила ва бучIантази багьуди кайсахънила шайчиб халаси хIянчи бирни багьандан.
Жалал ХIясайниевичличил барх бузули калунти учительти илис гьаннара баркалла бикIули саби, школала учительтала ургаб илини бузахъес гIяхIти шуртIри ва тяхIяр-кьяйда акIахъни багьандан.
Жалал ХIясайниевичли школала бухIнаб, алавчарти мер-мусаличиб умудеш, ибгибдеш гIеббурцахъусири, сай хIерируси шилизир гьар замана билхъаби дурадуркIахъутири. Илини даим гьундури къулайси тяхIярличи дуршахъутири. ДурхIназир, жагьилтазир ВатIайчи, чула шиличи, саби хIербирути мер-мусаличи, халкьличи, школаличи, бузериличи диги адикьес къайгъилизив вирусири ил.
Жалал ХIясайниевичли сунела гIямрула рархкья ГIяйшат Сулайбановачил вецIал урши-рурси абикьур, гIяхIси бяркъра бедили, багьудира касахъили, гIямрула дякьличи дураиб. ГIяйшат Сулайбановани «Неш Игит» ибси ура касибсири. Илдала хъалибарглизибадти верхIел дурхIяли чебяхIси даражала багьуди касили саби, илдазибад авал гьанна бусягIятра багьудила учреждениебазиб бузули саби.
Ца рурси Зубайдат Жалиловнани ХIинтIала шила бекIла къуллукъуни заманалис дузахъули сари. Сунела дудеш кьяйдали жавабкардешличил, черетаили, сунечи хъарси хIянчи даимбирули рузули сари ил. Иш белкI хIядурбарахъес баянти дархьили, кумекбарибси саби Зубайдат БяхIмудкьадиевани, илис баркалла багьахъес дигулра.
Жалал БяхIмудкьадиевлис чIумаси арадеш биаб, сунела дурхIнала, илдачибад акIубтала хъулиб баракат ва бузерилизир сархибдешуни имцIадикIаб!

С.ГIябдуллаева