МухIела шилизивадси ГIялиев ГIяли МяхIям­ма­дович акIубси сай 1929 ибил дуслизив, хIурматла хъа­либарглизив. ГIяличи ЧебяхIси Ва­­тIа дергъла манзиллизир, да­хъал хIянчи чедуркъибтири. Виш­тIали левалли илини хан­дакьуни икъули, ха­латас кумек­ви­кIули, шаласи челябкьла ба­гьан­дан дахъал къиян-жапа дя­хIяур­тири.
Дергълис гIергъити дусмазивра ГIяли акьули хIейри. 40 дус МСО-лизив (районти-ургабси строительная организациялизив) бухгалтерли узули халаси бузери бариб. Ил «Тылла ветеран» би­кIуси уличи ва цархIилти ша­багъа­туначи лайикьвикиб.
Ишдусла февраль базличив ГI.М. ГIялиев Россияла Президент В.В.Путинна 2024 ибил дусла сентябрьла 2-личиб дурабухъунси Указ хIясибли «1941-1945-ибти дусмала ЧебяхIси ВатIа дергълизиб Чедибдеш сархибхIейчирад — 80» бикIуси юбилейный медальличил шабагъатлаварили сай.
ГIяли МяхIям­ма­дович ГIя­лиевли сунела гIям­рула рархкья ГIи­саева Па­тIи­мат ГIисаевначил урегал урши-рурси абикьур, илдас гIяхIси бяркъра бедили, багьудира касахъили, халкьла хIурматбирахъес бурсибарили, гIямрула гьунчи дураиб. ГIяли ва ПатIимат барх 65 дус хIеркабирули саби. Илдала хъалибаргли чула шилизибцунра ахIи, Ахъушала районнизибра халаси хIурмат сархили саби.
ПатIимат ГIисаевна акIубси са­ри 1934 ибил дуслизир, ил «ДР-ла рурибси донорла» уличи ва Бузерила ХIунтIена Байрахъла ор­денничи лайикьрикиб, 50 дус­ли­­чирра имцIали МухIела шилизибси амбулаторияла заведующаяли рузули калун. Акушеркала санигIятличи регIриубли, хьунул адамтас багаларирули, гIяхIцад бузерила гунзри кацIиб.
ГIялила ва ПатIиматла ца урши ГIялиев ГIиса ГIялиевич ДР-ла дурхIнала дахъал шалубарси клиникала больницала отделениела заведующийли ва илав тухтурли узули сай. ГIиса ГIялиевра устадешчевси тухтур сай, суненира арадешлизиб нукьсандеш лебти дурхIначи, зягIиптачи илди сагъбарес багьандан уркIецIиличил хIеруди бируси. Ил «ДР-ла арадеш мяхIкамбирнила шайчивси отличник» «Чихъси даражала тухтур» умачи лайикьвикили сай.
ГIялис ва ПатIиматлис чIумаси арадеш ва хъулиб баракат дулгулра, чула дурхIнани ва илдачибад акIубтани разибирули хIербиэс кьадарбиаб илдас.

С.ГIябдуллаева