Ахъушала шилизивадси ЧебяхIси ВатIа дергъла бутIакьянчи ГIямаров МяхIяммад ГIямарович акIубсири 1914 ибил дуслизив хIурматла хъалибарглизив.
ЧебяхIси ВатIа дергъ бехIбихьибхIели МяхIяммад ГIямаров сай гIяхIъулали ургъес арякьунсири. 1941 ибил дусла август базличивад 1945 ибил дусла майла 9-личи бикайчи нушала гIяскуртазив артиллеристли, гIур биалли командирли калун. Дергъ таманбиубли гIергъи халалгъуна сержантла уличи лайикьвикиб.
Дергълизив, чедибдеш сархес гъабзадешличил ургъни багьандан «ХIунтIена Зубарила» орденничил, «Гъабзадеш багьандан», «Германияличирад Чедибдеш сархнилис», «Киев 1500 дус биъни гьанбиркахъули» («В память 1500-летия Киева») бикIути медальличил шабагъатлаварибсири.
МяхIяммад ГIямаровли сунела гIямрула рархкья, малхIямси, халкьличи дигичерси, гIяхIти хIял-тIабигIятла регI Загьидатличил барх вецIал урши-рурси абикьур, илдас гIяхIси бяркъ бедиб, багьуди касахъиб, халкьла хIурматбирахъес бурсибариб ва гIямрула гьунчи дураиб.
МяхIяммад ГIямаровла дурхIни жура-журала жавабла къуллукъуначиб жавабкардешличил бузули, чула бузерила гьуни даимбирули саби.
Дергълис гIергъити дусмазибра МяхIяммад ГIямаровли халаси бузерила пай кабихьиб, гьар журала къуллукъуначив чеветаили, жавабкардешличил узиб, бунагь-хатIа урдуцаб сунела.
С.ГIябдуллаева
