ЧебяхIси ВатIа дергълизир дагъис­тан­лантани бегIлара жигарла бу­тIа­кьяндеш дарибтири ва илизиб Че­диб­деш сархнилизи илдани халаси пай ка­би­хьибтири. Сецад хIейгеси биалра, нушала детахълуми дахъал диуб. Дергъла балагь-кьадар къячхIедикибси цалра хъалибарг ка­хIелун Дагъистайзиб.
Амма тыллизиб чула бузериличил Чедибдеш гъамбиахъубтира камли ахIенри. Иш­бар­хIила замана илдала хIурматбарни нушала чеблара саби. Даргала гьар районнизиб леб бузерила ва тылла ветеранти. Илдала асилси бузери гьаннала жагьилтас гIибратра саби.
Ишаб наб гьанбушес дигулра Сергокъала­ла районна Хьар МахIаргила шилизирадси бу­зерила ва тылла ветеран Асият МяхIям­ма­­довачила. Дергъла кьяркьти дусмазиб саригъун­ти бузериличи дигичебти адамтачил барх илдани халаси къайгъи дакIубарибсири ну­шала бургъанти биругIеб гIеббуцес. Баркалла биаб чус Чедибдешла БархIи гъамбиахъес чу­ла лерилра баркьудлуми дяхIчиаънилис, нушала ВатIайс мардеш чедаахънилис!
ХIера, ишди бурхIназир Сергокъалала МКЦД-ла Хьар МахIаргилизибси филиалла ва ши­ла библиотекала хIянчизартани «Вете­ран му­баракварая» бикIуси балбуцлизир бу­тIа­кьян­деш дариб. Илди бузерила ветеран Асият МяхIяммадовачи гьаббакIиб. Чесабиуси байрамличил ил мубаракрирули, ЧебяхIси ВатIа дергълизиб сархибси Чедибдешла юбилейлис хасбарибси медальличил шабагъатларариб ва цархIилти савгъатуни пешкешдариб.
Нушанира Асият МяхIяммадова ва илиниван чула бузериличил гIяхIси мисал чебиахъути тылла ветеранти Чедибдешла БархIиличил му­ба­ракбирулра. Дигулра хIушала баркь-бац ва гIяхIти хIял-тIабигIят дурхIнани, илдала бар­кьибтани гIерасили, хIушаниван лерилра къайгъни даршудеш кабилзахъниличи дяхIчиаили!

Нушала корр.