ЦIализибад урехи хIебирахъути хIянчизартала – цIа дилшахъантала БархIи гьар дус дурабуркIуси саби ап­рель­ла 30-йчиб. Ил дебали урехиласи санигIятлизи халбируси саби, или биалра, илаб бузути адамтира камли ахIен.
Игитунала санигIят саби или буресра вирар, се­на­хIенну абалкунси цIализибад адамти берца­хъес гьамадси хIянчи ахIен. ЦIа алкунси мерличи ухI­наухъунхIели, илавадли дураулхъанал, яра хIел­хъа­налра балуси ахIен. Гьачам тIинтIбиубси цIа гьамадли бишахъес вируси ахIен. Дерубти секIайзи, яра газ, набт лерти мераначи цIадикалли, берцуди бара. ХIера, хIисаблизи кахIесили батеси анцIбукь ахIен ишдусла вацIурбази цIадиркнила анцIбукьра. Дерубти кьар дигахъес или адамтани цIа абилкьули саби, кIинайс кадиркути анцIбукьуначила пикрилра хIебухъи.
Илкьяйдали бирусив гьатIи? Кьар кьяйдали, ва­цIа­лизирти галгубира дерубти къаршидиркули диалли, илдази адалкунти цIа мякьлабсиличира чедур­хути диалли, дигIяндикибти дугIла мицIираглис гIяхI­цадла зарал бирули биалли, сен илди лерилра се­­кIал хIисаблизи кахIейсути? Ил секIал адамли сен хIер­гъуси багьес рирули ахIенра. Ца дусцун ахIен илдигъун­ти анцIбукьуни кадиркути. Гьачам адалкахъи зарал барили гIергъи, кIинайс хIе­барес сен хIе­ба­луси? Ил анцIбукьлизиб бегIлара де­цIа­геси се­кIал, цIадикахъибси адам варгес ва ил тан­бихI­ла­варес хIей­­рухIели.
Балули биалра, цацабехIтани тIабигIятлис зарал бирули саби, цархIилти илдигъунти кахти анцI­бу­кьуни детхIеахъес къайгъилизиб саби. Камли ахIен анцI­букьуни цIами дилшахъути адамтани чула жан кадихьили, цархIилтала гIямру уцахъути.
Ил хIурматла санигIятлизив узутазивадли ца сай МяхIяммадов МяхIяммадрасул ГIяхIмадовичра. Ил цIа дилшахъантала машинала шофер сай. Серхурси, сунела хIянчи дебали дигахъуси, къияндикибхIели кумекбарес хIядурси адам сай МяхIяммадрасул. 47 дусла гIямруличив илини 19 дус ил хIянчи бузахъули сай. Ил заманала бухIнаб илини сунечил барх бузутачил сегъунти-дигара анцIбукьуни чедаиб. Илдас хъулри, мицIираг, халкь, тIабигIят дерцахъес чевкъули саби. Бархкьябала къайгъни, илдани бируси хIянчи чебиули МяхIямадрасуллира илдас чIумаси арадеш булгули сай. «Чула хъалибаргуначи ара-сагъли чарбулхъаб, гьарил секIайзир гьарбизуни диаб», — викIули сай ил, цIа дилшахънатала БархIиличил сунечил барх бузути лебилра хIянчизарти мубаракбирули.
Дила белкI ахирличи биркахъули, бурес дигулра, им­цIа­бикIаб МяхIяммадрасулгъунти, хакьлис багалабирути, хIя­жат­­бикибхIели, кумекличи музабухъес гIелумхIебилзути адамти. Ил санигIятлизиб бузути лебилра чула БархIиличил му­ба­ракбирулра. Арадеш, гьав, гъира гьатIира имцIадиубли ди­гул­­ра. Баркалла биаб чус, халкьла гIямру дерцахъес кумек­бирнилис.

Анжела Мутазова