1986 ибил дусла апрельла 26-личиб Чернобыльла атомла хутIла станциялизиб, дунъяла атомная энергетикала тарихлизиб гьанагарси бехIемцI кабикибсири.
ИтхIели, буресагарли бахъал адамтас халаси зарал бетаурсири. Илдазибад гIяхIцад радиацияла нурлибяхъили алхунтири, азиртани чула мер-муса урдатурли арбякьунтири.
Баягъи анцIбукь кабикили гIергъи, гьатIиралра халаси зарал хIебиахъес, бехIемцIла асурти агардирнилизир Советский манзилла халкьли жигарла бутIакьяндеш дарибтири. Илдани чула гIямру ахIерахIедарили ва чула арадеш нукьсанбиркниличи хIерхIеили, дебали вайти, мицIирти жайс урехи алкIахъути, гьаваличи дурадиркути радицияла нурани тIашдизахъес багьандан халаси къайгъи дакIубарибсири – баргбердибси реактор «хIярибихьес» саркофаг белшунсири. Миллионти адамтала гIямру уцахъули, даршуси манзиллизиб илди игитуни бетауртири.
ГIямрулис дебали урехиласи, баргбердибси 4-ибил энергияла блокла мякьлаб, радиацияла нурани датиуси жагьаннабгъуна мерличиб бузутири адамти. Гьарил секундла «багьа» мекелли халасири. Хасти палтар чегьурли, радиацияла нуранани дяхъибти ва гьарра шайчи игьубти бетонна, мегьла, арматурала бутIни дебали къалабаси тяхIярли дучили, илди хасси тIакьализи лайдакIес гIягIнисири. ЦархIилтани биалли, алавти шими, къуюби, гьундури… умудирутири.
Нагагьладан, илдани гъабзадеш дакIухIедарили диалри, чеалкIуси наслулис ва алавчарси тIабигIятлис сегъуна зарал бирибал чили бала.
Чернобыльлизибси вайси анцIбукьла асар агарбарес багьандан, СССР-ла гьар мераначибад мурул адамти жибарибтири: Литвализибад, Грузиялизибад, Таджикистаннизибад, Армениялизибад… Гражданский оборонала кьукьни цаладяхъили, дархьибтири. Ца шайчиб кахIелун Дагъистанра. ГIяхIцад дагъистанлантанира илар жигарла бутIакьяндеш дарибти сари. Илдазибад бахъалгъунтани гIяскуртазиб къуллукъбарилри. Амма илди-ургаб лебри ВатIа гьалабси чебла ихъахъес бархьибти жагьилтира.
Чернобыльла мер-мусаличибад СССР-ла бегIлара гIергъиси полк дурабухъунсири 1989 ибил дуслизиб. БехIемцI кабикибхIейчирад 39 дус ардякьи сари.
Чернобыльлизибси бехIемцIла асурти агардинилизир бутIакьяндеш дарибти дагъистанлантала хIурматбарни нушала даимласи чебла саби.
ПатIимат Мирзаева
