Нушала хала бегIтани ахIерси Ва­тIайзир дявила кахти цIа дем­жур­хIели дергъла майдайчир чедаахъибти игит­дешличила, тыллизибтани дирахъути гъаб­задешла баркьудлумачила чеалкIуси наслули сен­нира хъумхIерту.
Уржибси хъалибарглизибван хIер­би­рули калунти советский халкьла Ва­тIай­­чи кахIедурхути дигила ва илала хъар­хIе­ра­гардеш багьандан жан кьурбандарес хIя­дурли биънила чебяхIси бетуцла бикьрумили детаурти далилти камли ахIен. Итди дусмазиб дарган мезличил республикализиб дурабулхъуси «Колхозла байрахъ» бикIуси (ишхIелла манзиллизиб «Замана» ибси уличи барсбарибси) газетализир дурадухъунти дубурлантачила ва нушала зурбаси улкала цархIилти миллатунала адамтачила цацадехIти макьалаби дарсхIедарили, сари лерти тяхIярли, газета бучIаннисра гьаладирхьулра.

Фронтлизибад кагъар
Нушала ВатIанни хъарбарили саби дурхъаси советский ванза немец гъармукабазибад умубарахъес. Нушала ванза багьанданти дявтазир, урус халкьличил ва нушала ВатIанна царилти халкьличил далли, нушара, Дагъиста уршби, душмайчи къаршили дургъулра нушала жан ахIерахIедарили.
Нушала часть, Смоленск шагьар азадбарес багьанданти дявтазиб игитли бургъиб ва ил багьандан чевяхIси Сталинна баркалла касиб.
Дигути юлдашуни, Дагъиста къиянна халкь! ХIушази малли бурулра, нуша гьаннаван эргъира игитдешличил дургъехIе нушала ахIерси ВатIан Гитлерла бандитуназибад арагIебли азадбарес багьандан.
Фронтлизибти Дагъиста дурхIнани хъарбарниличибли кагъар къулбасбарибти орденоносецуни: М.Эльдерханов, А.Тюрин.

Юлдаш Сталинничи
АхIерси нушала дудеш! Ишди бурхIназир нуша дебали шадли сарра. Нушачи, гьарахъси дубулла шилизи, Игит вакIили сай. Нуша харили сарра нушала хъалибаргли
ВатIаннис Игит гибниличи. Нушала шанти харили саби чула шан Игит левниличи. Саид Алиев лебилра Советский ВатIанни валули сай. Советский Союзла лебилра халкьанани вагьурли сай аварла халкьла асил урши.
АхIерси Иосиф Виссарионович. Ишди шад­дешла бурхIназир нуша – Игитла дудеш, неш ва хьунул, хIед баркалла дикIулра. Простой ду­булла адамлизивад Советский Союзла Игит ай­кьурси хIу сайри. Халаси баркалла биаб хIед, нушала гьалмагъ, нушала дудеш, нушала вождь.
Игит Сааду нушала хъалибарглизи ва­кIиб. Нушала хъалибарглизиб Игитла мургьила зубари ухули саби. Илала лямцIли хъали шалабарили саби, нушала уркIби ванадарили сари, нуша харидешли ва шаддешли ди­цIа­хъилра.
ХIед деза биаб, чевяхIси вождь – Советский Союзла Игит айкьурси.
Деза хIед биаб, нушала урши гьунартачи ва душмантачибад таманси чедибдеш сархниличи халкь бикуси Верховный Главнокомандующий!
Советский Союзла Геройла хъалибарг: Дудеш – Али Даудов, неш – Марьям, хьунул Парсигат.

ВецIал фронтовикла неш
Ярославская областьла «Коммунизмаличи гьуни» бикIуси колхозла член Прасковья Ефимовнала у, областьла колхозникунала ургаб машгьурси саби. Сунела гьести гIямруличи хIерхIеили илини ишдуслизир 300-личир имцIякь къиянна бархIи дариб. Прасковья Ефимовнани И.Сусанинна уличилси танкабала калонна барахъес 3 азир къуруш арцла, бяхъибти боецунас дахъал овощиби ва картушка дедиб.
Прасковья Ефимовнала хIекьлизиб Михаил Иванович Калининни бакьиб. Калининни иличи кагъар бархьиб:
«Юлдаш Морева, — или лукIули сай юлдаш Калининни, — хIела уршбани чедибдеш сархили, хIу биалли арали риубли уркIи-уркIилабад дигулра. ЧIумали хIела някъбурцулра».
Юлдаш Калининна кагъарли рухъна колхозница дебали шадрариб. Сунела ур­кIи­лабадси баркалла бурули, илини Михаил Иванович Калининнизи гъай бедиб: «Мал­гIун къачагъуни — гитлеровецуни жявжявли дарбадягъин барес багьандан ахъри бакIибцадхIи рузус» или.
Колхозница Прасковья Ефимовна Моревала вецIалра урши дергъла гьалар-гьаларти бурхIназибал ВатIан багьандан игитдешличил бирхIули саби. Сунела уршбачил балли Прасковья Ефимовнани сунела дурхIнала 14 дурхIяра фронтлизи гьуниббатур.

ПатIимат Кьурбанова