Гьалабван Дахадаев­ла район­на администра­ция­лизиб гьар жумягI­ли­зиб дурабуркIни гIядатли бе­таурси совещание бетерхур. Бал­буцла дазурбазиб алхунси ургъан ГIябдул­лагь МяхIяммадовла дудеш­лизи Гъаб­за­деш­ла Орден бедиб.
Ил мягIничебси баркьуди дурабер­кIиб районна бекIла, Дахадаевлара Хай­дакьлара районтала дявила комиссарла, декIар-декIарти кабизунала руководительтала ва шимала бургала бутIакьяндешличил.
ГIябдуллагь МяхIяммадовли ахIерси ВатIа хъархIерагардеш багьандан сунела гIямру кьурбандариб. Илини дявила майдайчир гъабзадешла баркьудлуми дурадеркIибтири ва бархкьябас игитдешла ва патриот бяркъла мисалли ветаурсири. Балбуцличив гъайухъунси районна бекIли ургъанна бегIтази децI багьахъур ва ил игит уршили ВатIан балтахънилизи кабихьибси пайличила буриб.
«ХIушала урши ГIябдуллагь чеал­кIу­си наслулис гъабзадешла ва патрио­тиз­мала мисалли ветаурли сай. Улкала хъархIерагардеш багьандан ур­гъу­ли гъабзадешла баркьудлуми дура­дер­кIибси илала игитти баркьудлуми нушала уркIбазир даимлис кавлан. Ил гIяхI­гъаб­зачила нушани хъумхIертехIе ва ил­дигъунти багьадуртачи пахрубирехIе», — буриб районна бекIли.
Балбуцличир игитла бебкIали алхунси ургъанна хIурматбарницунра ахIи, нушала улкализиб даршудеш калахъес багьандан чула гIямру кьурбандарибтала хъалибаргуни гIердуцес хIяжатли биъниличилара гъай детаур илар.

Дахадаевла районна
администрацияла пресс-служба