ГIяхIдеш барес дигни адамла уркIилизиб алкIукад минабиубси къиликъ саби. УркIила хIялани сегъунти диаллира, илцадла имцIали чебаэс вируси сай ил. Дила пикрили, ил гьарил адамлизиб бируси саби, амма гIяхIти баркьудлуми дурадуркIес гIягIнибиркур, сенахIенну чайлизи кабихьибси чакарван ил къиликъ беткахъес асубирарну. Ил, гьарил адамли гIяхIти баркьудлумачил гьалабяхI башахъес гIягIниси саби. Илкьяйдали, барибси гIямалагарси баркьудили цархIиллара уркIи разибирахъу, вегIлисра итил дунъяличиб багалабирар.
Дила белкIлизиб адамла гIяхIдешличила ца мисал гьанбушес дигулра, гIячихъли буралли, Избербаш шагьарлизир хIеррируси 27 дус риубси Халаева Камила МяхIяммадрасуловначила. Сунени касибси санигIят хIясибли ил учительница сари, бусягIятла замана ил декретличир — хъулир сари, сунела акIубси риштIаси рурсиличи хIеруди бирули. Камила риштIахIейчирад мицIирагличи дебали уркIецIичерси рири. Илди зягIипдикибхIели мякьларад шалгIеррухъес хIерири. ХIера, чумал дус гьалар илини чилра агарти ва хIердиэс мер-муса агарти, зягIипти мицIирагличи хIеруди барес кьасбариб. Илди хIердиахъес мерра баргили, сарира вяшрикIес рехIрихьиб. Гьанбушес гIягIнибиркур, илала хIябал баз риубси риштIаси рурсира лерниличила. Или биалра, нешличир ил ратурли мицIирагличи хIеруди барес рашули сари. Илала мурад бетерхахъес багьандан сари арцла шайчирад гIеррурцуси чилра аги. РегI гьалар рехIрихьибхIели, суненицун къайгъи гIямалбарес рирулри, амма мицIираг дахъдаибхIели, халкьличи хъарахъес чебуркъиб. Ил Интернетлизирад сунечи хIербикIути адамтачи дугьаризурли, чула имкан хIясибли кумекбарахъес тиладибирулри. Ил шайчибра гьар мурталра-декIар гьарбилзули ахIенри илис, ил багьандан зягIипдикибти мицIирагличил больницабази рашули, чеблумау рикес чевкъулира саби. Иличил ну тянишси ахIенра, амма илала баркьудлуми мурталра чедиулра. Халкьли дучибти кам-гьамти арц чина ва се барес ардякьунал кагъурти чедиахъули рирар илини. Кумекбарахъес дугьаризурхIели гIелумбилзути халкь, кIинайс иличи зянкъбикIар итгъуна мерличиб зягIипси, машинали бячIунси, дурхIнани вайбаркь барили башес хIебируси жита яра кецIа тебну, арбука или. Илис-декIар гIягIнитив илди, лебтасалра анцIдукьи диалли? АхIен. УркIецIи лебхIели илдигъунти гIяхIти баркьудлуми дурадуркIули сари илини, саригъунти халкьли язихъдарибти мицIираг сагъдиахъес къайгъназир сари. ЧевяхIси Аллагь кумеквиаб сунес. Арбякьунси яни, гьанбиркур, сунечир лерти мицIираг хIедяргIяхъес багьандан, чила-сегъунти гIягIниагарти палтар лерал даргили, илдачи чекалгьули. Чили-биалра илдасцун декIарбарибси мер агара, или биалра, мицIираглис ункъли биахъес Камила къайгъназир сари.
Гьар даим, имцIаливан житначил, кадиркути анцIбукьуначил ряхIигули сари ил. Гъяркадирути лихIби, къуйрукъуни, гьуни байбирхъухIели балу-балули дялчIути житни, ахъти мер-мусаличирад лайдикIути ва гIурра гьанагарти балагьунази дикибти илди дерцахъес гьамадли ахIен. Гьаннала замана цацабехIти халкьла хIял-тIабигIят дугIла мицIираглайчирра вайдиубли сари, барес хIяжатагарси секIал бирули саби, дурхIначи хIеръалли, бекIлил тамашавирули сай. Сен илкьяйдали бетаруси? Сен камбиубти гIяхIдеш барес гьалакти? Сен хъумуртути вегIли барибси вегIлис чарбирниличила? Сен илцадра кьяркьти, вайти, уркIецIиагарти адамти? Ил суаллис жаваб чинаб бургуси? ГIядабси анцIбукь саби, дурести гъай кавлули ахIен.
Дурути гъайличи лехIирхъалли, цалра вайси, кьяркьси, кьиркьирси адам агара, дирутачи хIерикIалли цалра гIяхIси агара. БегIлара халаси балагь кIибяхIяндеш саби. Ил къиликъ, адамлизиб бегIлара вайси саби. Кумекбарес гIягIнили биъниличила буралли, яра сегъуна-биалра гIяхIдеш барес, наб се бирара или хьарбикIули саби. Гьай-гIяйиб! ГIяхIдеш барес хIейрухIели, вайдешалра хIебируси биалри.
ХIера, нуни гьанрушибси хьунул адамличила гъайрикIасли гъай кахIедурхар. Ил багьандан, дила белкI ахирличи биркахъули, бурес дигулра, имцIабиаб илдигъунти, гIяхIдеш барес гьалакти, вегIличилацун ахIи, цархIилтачилара пикрибикIути адамти. Арадешра, ахъри-цIакьра чеимцIадиаб сунела гIурра кумекрикIахъес.
Рахли илар хIердирути мицIираглис кумекбарес дигуси левли виалли, гIергъиси номер балтулра 8988-630-37-65(тинькоф) лерилра чедаэс вирар иш адрес хIясибли angels_izberbash. ХIушани барибси гIяшдеш, чеимцIабиубли хIушачи чарбиаб!
Анжела Мутазова
