Ишди бурхIназиб Ахъушала районна судла Председатель ГIябдуллаев МяхIяммад НурмяхIяммадовичла кабинетлизиб ХIямшимала шилизибси урга даражала школала 11 ибил классла бучIантачил ва илдала классла руководитель ИсмягIилова Мариям Наримановначил гьунибаъни бетерхур.
Судла председатель МяхIяммад ГIябдуллаевли бучIантачил судла бузериличила ихтилат дураберкIиб. Судла бутIакьянчибала ихтиюртачила, суд бирухIели гьарилли се барес чебсил буриб. Низам-кьяйда дуалли, цархIилти адамтала ва пачалихъла давла бигIялли, адамличи зулму баралли, дяхъи-хъаславаралли яра кавшалли, ярагъ дихIялли сегъуна танбихI бирусил буриб.
– Адамтала давла бетахъалли ва цархIилти гIядлу-зегъа дуунси анцIбукь бетаалли, бегI гьалаб полициялизи багьахъес гIягIниси саби. Полицияла хIянчизарти ил мерличи бякьи, гьар секIал ахтардидарес чебиркур. Илдани къел-хIерзи даргалли, адамтира бикьруми барили, илди делкIес гIягIнити сари. СенахIенну, адамличибси гIяйиб кабизахъес багьандан, баянти диэс гIягIнити сари, –буриб М.ГIябдуллаевли.
Судьяни дурхIнази буриб, сегъунти делоби хIердирутил судличир: (уголовное, гражданское, административное ва бузерила хIекьлизирти). М.ГIябдуллаевли бекIлибиубси законничила – РФ-ла Конституцияличила, прокуратураличила, гIядлу-зегъа гIердурцути органтачила, юриспруденцияличила, судли детерхахъес дирути ихтиюртачилара аргъахъиб.
– Районна судли дурасибси хIукмуличи кьабулли хIебиалли, судла хIукму барили гIергъи кIел жумягIла бухIнаб ДР-ла Верховный судлизи гIярза (обжалование) белкIес вируси сай. Гьарил гIяйиблалаварибси адамли адвокат уцес ихтияр лебси саби, амма адвокат уцес ахъри агарли биалли, илис пачалихъли адвокат декIарвируси сай. Судли кабизахъес хIяжатси саби адамличиб гIяйиб лебал яра агарал, – буриб судьяни.
– Нуша лерилра чеабиуси наслуличила, илдала челябкьлаличила пикридикIес гIягIнити сарра. Илдас гIяхIси бяркъ бедес, вайти анцIбукьуназибад берцахъес, дурхIнази низам-кьяйда хIедуахъес чекадилзес. Нушаб гIулухъабачил иргъахънила хIянчи дураберкIес чебиркур. БелчIудилизи ихъеная, спортличи диги имцIабиахъес къайгъибарая, жузи дучIеная, бегIтала ва учительтала ибси биреная, – викIи МяхIяммад НурмяхIяммадович.
МяхIяммад ГIябдуллаевли школала бучIантачил чули челябкьлализиб сегъуна санигIят касес кьас лебал хьархъардяхъиб.
– Лерилра санигIятуни гIяхIти сари, гьарил сунес дигуси санигIят касахъес валтуси сай, амма гьарилли сунела ихтиюрти дагьес гIягIнити сари.
Школала бучIанти иштяхIличил лехIяхъиб судьяни дурути гъайличи. Пагьмучебти, спортличи дигичебти, юристла санигIят касес пикрибикIути, судьязи законтала тIалабуначила жура-журала суалти хьардиути, чузи хьардаибти суалтас жавабти дурес балути лебри школала бучIанти-ургаб.
ГIур судьяни бучIанти ва илдала классла руководитель жибариб судличи, районна судла заллизиб дурабуркIуси судличир уголовное дело хIербирути тяхIяр-кьяйда чедаахъес. Школала бучIанти 17 дус биубти сабри, ил багьандан илдас ихтиярбариб судличиб калахъес.
Суд бетурхулри судла Председатель МяхIяммад НурмяхIяммадовичла бекIдешлиуб.
Илабра школала бучIанти гIяхIил лехIбизурлири, суд бетурхути тяхIяр-кьяйдаличи халаси пикри бяхIчиаиб.
Школала бучIантани ва классла руководитель Мариям ИсмягIиловани чучил къаршибикнилис М.ГIябдуллаевлизи баркалла багьахъур.
С.ГIябдуллаева
