Гьаларван ИцIарила шила бекI виркIнила выборти дурадеркIиб. ТIамри дедили гIегъи, шила бекI Ибрагьим Шамхалов ветаъни якьинбиуб. Бахъла хIурматличи лайикьикибси иличи жамигIятли игьдибар бихьни дигесира саби.

Ибрагьим Шамхалов декIар-декIарти хIянчурбачив устадешличил узули вири. Илини сунела бузерила цаибти гунзри кацIибтири «ИцIари» колхозла механизаторли узули. ГIур узули калун «Каспий» ФГУП-лизив. 2007-ибил дусличивадли 2012 ибил дусличи бикайчи ИцIарила  шила Советла бекIли узули калунсири. ИлхIели илини шила мер-муса гIяхIцадла жагадариб. И.Шамхалов узули калун районна бекIла насихIятчили ва «ИцIари» вацIа-майдайчи (парк) хIеруди бузахъанни. Иличибли багьесли саби ил гьар шайчивадли хIядуриубси багьудичевси ва устадешчевси хIянчизар виъни.

Шила вайра гIяхIра гIяхIил далуси, шантачил къугъали валикибси ва бажардичевси И.Шамхалов ицIарилантани гIевуцнира гIяхIси баркьуди саби викIес вирар. Сай акIубси шилизир адамтала гIямрула ва яшавла шуртIри къулайдиахъес ва жамигIятличи къячдилкути масъулти чедетаахъили ирзес къайгъибирниличи шанти бирхни якьинбиуб ил шила бекIли катурхIели.

Ибрагьим Шамхаловли сунечи игьдибар бихьни багьандан шантас ва комиссияла члентас баркалла багьахъур. Илини буриб: «ХIушазивадли гьарилличи ну разилира шилис бекIдеш дарахъес набчи игьдибар бихьнилис. Дила бекIлибиубсигъуна мурадра ИцIарила ши гIяхIсигъунали, урехиагарсили, гьалабяхI арбякьунсили бетаахъни саби. Нушала дигуси ши сагати ахъанайтачи баахъес багьандан хIушачил къайгъичевли узес ну хIядурлира».

Давхадаевла районна администрацияла пресс-служба