ТIабигIятли ванзалис хIебла ряхIятси гьавара пергерти бурхIнира пешкешдарибмад дубурланти авлахъличи дурабулхъни гIядатли бетаурси саби. Колхоз-совхозла хIянчи агархIелира, илдас саби-бегIти хъуми-унхъразир дарести камхIедирар. Илкьяйдали ванза бузахъес ункъли бажардибиркутири нушала бегIти ва хала бегIти. Гьанна ярга нушачира баили саби. Дубурла шимазиб чула сабухъчебси бузериличирли ризкьи ва духълуми, цIедеш сархути камли ахIен гIергъити дусмазибра.

Дигеси саби дахадаевлантира СПК-базир ва цархIилти цалабяхъуназир гIяхIти сабухъуни дурчес бажардибиркни. Ишди бурхIназир «Бускри» СПК-ла авлахъуначирра техника дузесаили сари. Сецад жявли зяхIматчиби авлахъла хIянчилизи ахъаллира, илкьяйдали илдани сабухъунира имцIали дурчни лебтасалра якьинси саби.

МягIничебси саби гIебшнила дегIнубас минеральный удобрение пайдаладирнира. «Бускри» СПК-ла председатель МяхIяммадзапир ГIябдуллабековла гъай хIясибли, удобрение дархьли пайдаладирниличирли хозяйстволизир дашахъути ризкьила сабухъчебдеш имцIабирахъуси саби.

Илди хIянчи дурадуркIнила дурарадли, бускрантани шила хозяйствола сагаси манзилличи (сезон) хIядурбикIнила дазурбазир 7 гектарличи тIутIила анхъ убалтнила хIянчи дурадуркIули сари.

«ТIути дашахъни гIядатлибиубси баркьуди ахIен, челябкьлализир чягъир дирнила бетуцра гьалабяхI аркни саби. Регионна тIабигIятла сурсатуни пикрилизи касили, нушани тIутIила гIяхIтигъунти сортани дашахъесра пикрибарилра», — буриб М.ГIябдуллабековли.

Илкьяйдали хозяйстволизир хъуми далцнила хIянчира дурадуркIули сари.

«Бускри» СПК-лизир хIебла авлахъла хIянчи дурадуркIни лебилра коллективла уржибси бузерила бетуц саби. Гьар бархIилизир декIар-декIарти масъултира имцIадикIули сари, амма бускранти гIела битIикIули ахIен ва сегъунти-дигара къияндешуни дяхIяэс бажардибиркули саби. ХIеб дакIили сари гьанна ва давлачебси сабухъ сархниличи умутли адамтира бузерилизи ахъили саби», — багьахъур шила хозяйствола отделла начальник МяхIяммад ГIябдуллабековли.

Дахадаевла районна администрацияла пресс-служба