Шашкабала адам пикриикIахъуси столла хIяз саби, сабира кIел адамлицун дураберкIес вируси.
Гьачамлис шашкаби секьяйда дакIудиубтил кабизахъурси тарих агара. Амма хIушанира пикрибарадалли, ил хIяз жявхIейчибадал лебси саби. Дусми шалгIердухъун шашкабала тяхIяр-кьяйда дарскадиуб. ХIязлис пайдаладирути гIягIниахълумира дарсдиуб.
Нушачи даили сари шашкабала тяхIярла хIязани, сарира гьаннала манзиллизир столличирти доскабачилти декIарти журабазир дурадуркIути.
XIX ибил даршдусличибад бехIбихьили, улкни-ургабси шашкабала абзлизиб чедибдеш сархибти декIарбирутири. Цаибилгъуна улкни-ургабси шашкабала абз 1885 ибил дуслизиб Амьен шагьарлизиб бетерхурсири. Илар француз Анатюль Дюссони чедибдеш сархибсири. Улкни-ургарти шашкабала хIязанала ва Россиялизир дурадуркIути хIязани декIардулхъутири.
Наб ишаб бурес дигуси МяхIяммад Кьурбанов сай, суненира ишди бурхIназиб МяхIячкъализиб дураберкIибси шашкабала шайчибси гьаргси чемпионатличиб чедибдеш сархибси. Илис кIиибил мер бикиб.
М.Кьурбанов 1985 ибил дусла ноябрьла 9-личив Ахъушала районна МухIела шилизив акIубси сай. Илини школа шилизиб таманаибсири. МяхIяммадла школализир кадирхьути дурусти гIилмуртачи: математикаличи, физикаличи, химияличи диги акIубтири. Илала багьудлуми чедирцIахънилизи халаси пай кабихьибсири математикала учитель СултIан БяхIяммаевичли. МяхIяммадли школализив учIули левай, математикала олимпиадабачир бутIакьяндеш дирутири ва гьаларти мерани дурцутири. Илини 2003-ибил дуслизиб школа таманбариб ва ДГТУ-лизи учIес керхур. Университетлизив учIуси манзиллизиб сабри МяхIяммадла шашкабачи бегI гьалаб иштяхI дакIубухъунси. 2016 ибил дуслизив ил чекайзурли шашкабала хIязлизи ахъиб. Илкьяйдали МяхIяммад гьаланачи сунела юлдашуначил ва гъамтачил шашкабала хIязли виркьулри. ГIур биалли, ункъли хIязли виркьули, абзаназир бутIакьяндеш дирес вехIихьиб. Илини Ахъушала ва Лавашала районнизирти шашкабала абзаназир бутIакьяндеш дирулри ва мурталра чедибдешцун сархулри. Илала дурабад илини тах шагьарлизирти абзаназир бутIакьяндеш дирес вехIихьиб 2018 ибил дусличивад, ва илавра МяхIяммад мер хIебуцили кахIелун.
2020-ибил дуслизив МяхIяммад Кьурбанов Россияла шашкабала спортла кандидат ветаурсири.
Нушанира МяхIяммад Кьурбанов сунени сархибти чедибдешуначил мубараквирулра. МяхIяммадли Дагъиста ва Россияла шашкабала шайчибси спорт гьалабяхI башахънилизи халаси пай кабирхьули сай. Нушала шайзирад МяхIяммадлис гьатIира сархибдешуни ва гьарбизуни дулгулра!
Рабадан БяхIяммадов
