Ахъушала районна школабазиб леб бахъал пагьмучебти учительти, дурхIнази багьуди касахъес ва гIяхIси бяркъ бедес багьандан халаси къайгъличил бузути.
Илдазирад ца сари МухIела шилизибси лицейлизир урус мезла ва литературала дурсри кадирхьули, 1982 ибил дусличирад рузуси Кьурбанова Раисат Жунаевна. Раисат Кьурбанова 7-ибил классла руководитель сари.
ДурхIначи дигичерси Раисат илдас гIяхIси бяркъра бедили, багьудира касахъес къайгъназир сари. Р.Кьурбановани бучIахъути дурхIни районна кьадрила олимпиадабачиб ва конкурсуначиб гьаларти мераначи лайикьбиркули саби. Илини гьарил сунени учIахъуси дурхIяличил ихтилатуни диру, илдас гIякьлу буру, школализиб лебалли илдачи хIеруди биру, селра вайси анцIбукьлизи, нукьсандешлизи хIебикахъес багьандан. Раисатлис, чула дурхIначи илгъуна хIеруди бирни багьандан, бучIантала бегIтира баркалла бикIули саби.
Раисат Жунаевнани бучIахъули калунти дурхIни гьар журала санигIятуначи бегIбиубли саби, илдазиб леб учительти, тухтурти, юристуни ва цархIилтира жавабла къуллукъуначиб бузути.
ХIянчилизир дахъал сархибдешуни диахъни багьандан, Раисат Жунаевна 2010-ибил дуслизир «РФ-ла цахIнабси багьудила хIурматла хIянчизар» ибси уличи лайикьрикиб.
Раисат Кьурбановани гIямрула вархкья ГIяли ГIусмановличил барх хIябал урши-рурси абикьурли, гIямрула дякьличи дураиб. Илдира декIар-декIарти къуллукъуначиб бузули, бузерилизир сархибдешуни дирахъули саби. ГIяли ГIусмановра лицейлизив физкультурала дурсри кадирхьули узули сай.
Илдала хъалибаргли шила халкьла, саби бузути коллективла, дурхIнала ва илдала бегIтала ургаб халаси хIурмат сархили саби.
Гьаннала гIергъира чула бузерилизир ва гIямрулизир сархибдешуни имцIадикIули, чула дигутани разибирули хIербиэс кьадарбиаб чус!

Сабият ГIябдуллаева