МухIела шилизибси лицейлизир бехIбихьудла классунала учительницали рузули сари КьадарбяхIяммаева Зубайдат Кьурбановна.
Школа таманбарили гIергъи, ил Дагъиста пачалихъла пединститутлизи карерхурсири. Илаб физикала факультет таманбарили, диплом касибхIели, Лавашала районнизи рузахъес рархьибсири. Зубайдат Кьурбановнани цаибти бузерила гунзри кацIиб 1983 ибил дуслизир Лавашала районна ЦIухтамахьила урга даражала школализир.Ил школала учительти Зубайдат Кьурбановнас разили гьунибаибтири. Пагьмучерси, къайгъичерси жагьси педагог, бяркъла шайчирси директорла заместительла къуллукъличи каратур.
З.КьадарбяхIяммаевани бучIахъули калунти дурхIназибад цацабехIтани учительла санигIят чеббикIиб. Зубайдат Кьурбановнани чузир диги акIахъубхIели саби илдира учительти бетаэс хьулбухъунти.1990 ибил дусличирад Зубайдат Кьурбановна рузес рехIрихьиб МухIела шилизибси лицейлизир, бехIбихьудла классунас дурсри кадирхьули. Илини бучIахъули калунти шилизи бакIалли, чула учительницаличи гIяхIладли башар, чула сархибдешуначила бурес дигахъу, Зубайдат илдачи иштяхIличил лехIирхъули рирар, илдира сунела дурхIни кьяйда дигахъу.
Дахъал дусмазир З.Кьурбановна лицейлизир бехIбихьудла классунала методический отделла руководительра сари. Гьаман лицейзир дурадуркIули дирар декIар-декIарти далдуцуни. Жагьилти учительти дугьабизалли, Зубайдат илдас кумекбарес гьалакли рирар. Лицейлизиб бузутала, дурхIнала ва илдала бегIтала ургаб хIурмат сархили сари илини, санигIятлис марси, дурхIначи дигичерси учительница сархIели. Зубайдат Кьурбановна «РФ-ла багьудлуми тIинтIдирнила шайчирси отличник» ибси уличира лайикьрикили сари.
Гьаннала гIергъира сархибдешуни имцIадикIаб!
С.ГIябдуллаева
