Лебтанилра балуливан, гьанна хIябал дус дикили сари Украинализиб дявила хасси балбуц бехIбихьибхIейчирад. Ил балбуцлизир нушала Дагъиста дурхIнанира ВатIа хъархIерагардеш балтахъули, гъабзадешличил бургъули, бутIакьяндеш дирули сари.
Наб дила макьалализиб бурес дигулра СВО-лизиб бутIакьяндеш дарили, илав декIли вяхъили, арадешлизиб нукьсандеш акIубли чариубси, Избербаш шагьарлизивадси БяхIяммаев Артур Запировичличила. Иличила наб жявлил белкIес дигусиригу, гьаладихьибти баянти дахъ камли диъни багьандан, гIеркъарикира.
Артур акIубси сай УбяхI МулебкIила шилизивадси Запир БяхIяммаевла хъалибарглизив, Избербаш шагьарлизив. Сунела хъалибарглизив Артур халалгъуна урши сай, илала кIел-гьатIи узира леб.
Артур виштIахIейчивад серхурси, селизивадалра уруххIекIуси, гIяхIти хIял-тIабигIятла урши сай. 1-9-ибти классуни илини шагьарла 11 ибил школализир таманаибти сари, 10-11-ибти классуни — шагьарла 12 ибил школализир. КIинайс ДГУ-ла Избербаш шагьарлизибси филиаллизиб юридический факультет таманаибсири.
БелчIуди хъараахъурли гIергъи, илини Россияла гIярмияла къяяназиб къуллукъбарибсири. Илавад чариубхIели, Дагъиста мегьла гьундурачи хIеруди бузахъули узули калунсири.
Хъайчикайибси сай гIяймакан исбагьи Заирачи. Илдани барх кIел урши абилкьули саби.
СВО бехIбихьибти бурхIназив Артур гIяскуртазиб къуллукъбарахъес гьатIира живарибсири. Ил гьала-гьала Чечнялизив, бургъанти хIядурбируси дявила частьлизив гъал бархIи калунсири. ГIур биалли, 2022 ибил дусла октябрьла 28-личивад 2023 ибил дусла февральла 2-личи бикайчи Украинализив Донецкла областьлизибси Марьинка бикIуси шагьар азадбалтахъули миллатчибачи къаршили ургъусири.
«2023 ибил дусла февральла 5-личиб нушала кьукья Запорожский областьла Работино шилизи дархьибтири. Илар цIакьти дявти демжурлири. Апрельла 13-личир душмантала ракетала хIярхIубау дикира. Ну ил гьужумлизив декIли вяхъира, кьяшлизи бургIлуми чегили. Илар нушала дахъал детахълумира диубтири…», — буриб А.БяхIяммаевли къантI-къантIли.
Артур илав ил бархIи калири. Илис медицинала цаибси кумек дявила майдайчибси палаткабазибси госпитальлизиб гIеббаахъибсири. ГIур Крымлизибси Феодосия бикIуси шагьарлизибси госпитальлизиб 10-15 бархIи арадеш къулайбирули калунсири. КIинайсра Артур Чечнялизибси дявила госпитальлизи шурватурсири.
Ил бусягIятла замана дяхъурби сагъдарес дявила госпитальтази дугьаилзули сай. Илала кьяшлизир гьаннара 4 бургIяла лер. Илди кахси дергъла чархлизир калунти къел-хIерзи сари.
Артурли дергълизир дакIударибти гъабзадеш пачалихълира чихъли кьиматладариб. Ил Жуковла уличилси, «Дявилизив асилдешличил декIарухъни багьандан» медальтачира лайикьикиб.
МулебкIан багьадурлис наб далгес дигула чархлизиб къаркъагъуна арадешра, хъулиб баракатра.
Бургьаб, берхъаб, бахъбааб
Гъабзадешчебти уршби,
ЧеалкIутас даршудеш
Сархес гъазализибти.
Хала дудешуниван
ЦIализи бухIнайхъути,
Душман вячIес гьалакли,
ГIямру мяштIхIедирути.
Раисат МуртузагIялиева
