Ахъушала районна больницализиб бузули жагьилти, пагьмучебти, духути, зягIиптачи уркIецIичебти, чули касибси санигIятличи балбикибти ва илис марти бахъал тухтурти леб.
Чумилра адамлизибад бакьира, «рахъ духуси, сунела санигIятлис марси, дяхI шаласи, малхIямси, устадешчерси, гьарли-марси тухтур саригу Марьям ГIисаева» или. Марьямличила гапбикIути бахъал бургар, сенахIенну арадешлизиб нукьсандеш лебти адамтачи уркIецIиличил лехIрилзан ва сунени белгибарибси изалара, белкIунси дарманра, лечениера дархьтили урдулхъан. Изала кабизахъес гьалаб сегъуна тяхIярличил ил дакIубухъунал, сегъуна дарман лебал зягIипсилис балхIебиркуси ахтардибиру. БусягIят ГIисаева Марьям ГIябдуллаевна рузули сари терапияла отделениела заведующаяли. Сунени бируси хIянчи чебетаахъили, жавабкардешличил бетурхахъули сари.
Дагъиста пачалихъла медицинала институт Марьямли гIяхIти кьиматуначил хъараахъурсири. Марьямла бегIтира халкьла хIурмат сархибти адамти саби, неш Зубайдатли ва дудеш ГIябдуллагьли жагали, бяркъра бедили, багьудира касахъили, хIябал урши-рурси абикьурли, гIямрула гьунчи дураиб. Илдазирад ца сари Марьям – тухтурла санигIятличи регIриубси, сарерхурси, лебтасалра манпагIятси, сунела гъамтасра, унрубасра, илкьяйдали районна больницала сари рузуси отделениелизи дугьабизуртасра.
Марьямли сунела гIямрула вархкьячил барх хIябал урши-рурси абилкьули сари. Илди бяркъчебтили халабиахъули саби.
Сари рузуси коллективла ва Ахъушала шила халкьла хIурмат сархили ва баркаллаличи лайикьрикили сари Марьям ГIябдуллаевна.
Илкьяйдали, халаси хIурмат ва баркалла сархили сари районна больницала неврологияла отделениелизир медсестрали рузуси ГIялиханова Разият Чупановнани.
Разият ГIялихановачилара бахъал саби гапбикIути, зягIиптачи чебетаахъили хIеруди бирули сари или. Сунечи хъарси хIянчи жавабкардешличил хъарарахъули, капельницаби, уколти дебали гIяхIил, устадешличил дирули сари.
Разият Чупановна акIубси сари Усишала шилизир, хIурматла хъалибарглизир. ГIяхIти кьиматуначил медучилищера таманбарили, медсестрала санигIятличи регIриубли, дахъал дусмазир районна больницализир рузули сари.
Сунела гIямрула вархкьячил барх кIел урши абилкьули сари.
Марьямра, Разиятра цархIилтас гIибратли бетаурли саби. Илдас чIумаси арадеш, чула гIямрулизир, бузерилизир сархибдешуни диаб, гьарилла хъалибарглизиб балгундеш ва баракат имцIадикIаб! Чула дурхIнани разибирули, хIербиэс кьадарбиаб!
С.ГIябдуллаева
