Ишди бурхIназиб Ахъушала районнизи бузерила архIя дураберкIибсири ДР-ла Правительствола Председатель ГIябдулмуслим ГIябдулмуслимовли, илала заместитель Руслан ГIялиевли, ДР-ла Халкьла Собраниела депутат Нагьбар Кьурбановли ва цархIилтанира.

ГI.ГIябдулмуслимовли «Ахъушала район» МО-ла администрацияла актовый заллизиб, дахъал дусмазиб хIялалси бузери барибти, хIянчилизир сархибдешуни диахъубти чумал адам ДР-ла Правительствола шайзибад Баркаллала кагъуртачил шабагъатлабариб. Илди-ургар лерри МухIела шилизибси Кь.Кьурбановла уличилси гимназиялизир Англияла мезла  учительницали рузуси  Кьурбанова ПатIимат Къаратовна.

ПатIимат Къаратовнани сунела бузерила гьуни бехIбихьибсири 1984 ибил дуслизир учительницали рузули. Гьанна ил 41 дус рузули сари.

ПатIимат Къаратовна ЧебяхIси категорияла учительра, 10-ибил классла руководительра сари. 2006-ибил дуслизир «БегIлара гIяхIси мугIяллим» – ибси уличи лайикьрикиб ва даршал азир къурушла Грант касиб. 2019 ибил дуслизир РФ-ла багьудлуми тIинтIдирнила Министерствола шайзирад ХIурматла Грамоталичил шабагъатларарибсири. Илини сари рузуси гимназияла Профсоюзла организациялисра бекIдеш дирули сари.

БучIантази багьуди касахъес, сунени кабирхьуси дарсличи диги имцIабиахъес даим къайгъилизир сари.

ПатIимат Къаратовнани бучIахъути дурхIнани республикала ва районна кьадрила Англияла мезла олимпиадабачир бутIакьяндеш дирули, мурталра гьаларти мерани дурцути сари.

ПатIимат Къаратовнани Ахъушала районнизиб «БегIлара гIяхIси классла руководитель» бикIуси, классла руководительти-ургаб бетурхуси конкурслизир бутIакьяндеш дарили, кIиибил мер касиб.

ПатIимат Кьурбановани авал урши-рурси абикьурли, гIяхIси бяркъра бедили, багьудира касахъили, гIямрула дякьличи дураили сари.

МухIела шила халкьла, сари рузуси коллективла ва бучIантала ургаб халаси хIурматличил пайдаларикIуси мугIяллим сари ил.

Гьаннала гIергъира бузерилизир ва гIямрулизир сархибдешуни имцIадикIули хIерриэс кьадарбиаб хIед, ПатIимат Къаратовна!

С.ГIябдуллаева