Ражабова ХIялимат ГIялиевна акIубси сари ТIантIала шилизир, халаси, хIурматла хъалибарглизир. ТIантIала шилизибси урга даражала школа гIяхIти кьиматуначил таманбарили гIергъи ил Дагъиста культурала ва искусствола колледжлизи карерхур ва илра гIяхIти кьиматуначил хъараахъур.
ГIур ХIялиматлис кьадарбиуб Бутрила шилизир минариэс. Илини 2004-ибил дуслизи школализир хореографияла дурсри кадирхьули, дурхIни делхъличи бурсибирули, сунела бузерила гьуни бехIбихьиб. Пагьмучерси, жавабкардешличил рузуси ХIялиматли сунечи хъарси хIянчи чебетаахъили даимбирули сари. 2011 ибил дусличирад Бутрила шилизибси Россияла халкьла культурала Центрла художественный руководительли рузули сари.
Илини Бутрила шила, культурала управлениела гIямрулизир жигарла бутIакьяндеш дирули, культура гьалабяхI арбукес гIяхIцад къайгъи дакIубирули сари. Районна духIнар ва дурар республикала кьадрила ярмаркабачир, фестивальтачир, конкурсуназир, байрумтачир ва цархIилтира фольклорла шадлихъуначир илини миллатла палтарра чегьурли, жагали делхъ диру. Миллатла дуббатуни гьаладирхьули, чинаралра жигарла бутIакьяндеш дирули, чехалабиуси наслулизи гьалабла манзилла гIядатуни хъумхIертахъес бажардилизир сари ХIялимат.
Илини делхъличи бурсибирути рурсбани, жура-журала делхъани, сценкаби дирули, гьарил делхъличи далдикибти палтар, кIунбира хIядурдирули, Бутрила шилизир детурхути шадлихъуназир жигарла бутIакьяндеш диру.
Сунени бекIдеш дируси Центрлизир ХIялиматли дахъал гьалабла заманала ваяхI дучили, музейлизир кьяйдали гьаладихьили сари.
Сунела гIямрула вархкья ХIябибличил барх ХIялиматли хIябал дурхIя абикьурли сари. Илдас гIяхIси бяркъра бедили, чебяхIси даражала багьудира касахъили, гIямрула гьунчи дураили саби. Бутрила шилизибра, сари рузуси культурала управлениела коллективлизибра ХIялимат ва илала хъалибарг хIурматличил пайдалабикIули саби.
ХIялимат Дагъиста культурала Министерствола, «Ахъушала район» МО-ла администрацияла, культурала ва туризмала управлениела шайзирад чумал ХIурматла Грамоталичил шабагъатларарили сари.
Илис арадеш, гIямрулизир ва бузерилизир сархибдешуни, хъулиб баракат дулгулра!
С.ГIябдуллаева
