Байгинат БяхIяндова ва Умукусум Булатова гIяхIцад дусмазиб Ахъушала шилизибси дурхIнала анхълизиб бузути саби. Коллективлизиб уржибти, чучи хъарси хIянчи чебетаахъили, жавабкардешличил бетурхахъути, адамдешла бегIти, хIурмат сархибти биштIатачилра халатачилра гъай даргес балути хьунул адамти саби кIелра. Байгинат ва Умукусум дурхIнала анхълизи биштIати бикули башути бегIтачира дяхI шалали дугьабилзан, биштIатачи дигичебли хIербилзан.

Чула дурхIнира илдани бяркъчебтили абикьур. Байгинатли хIябал урши, Умукусумли хIябал урши-рурси. Байгинатла  дурхIначибад акIубтира леб гьанна, хIябал дурхIя. Илди жагали абикьахъес, илдас гIяхIси бяркъ бедес къайгъилизир сари гьанна ил.

Байгинат БяхIяндова «Ахъушала район» МО-ла администрацияла, багьудила управлениела шайзирад ХIурматла Грамоталичил, Дипломтачил шабагъатларарибсири, дахъал жура-журала Сертификатуни касибтири.

Умукусум Булатова ДР-ла багьудила ва гIилмуртала Министрла, районна багьудила управлениела шайзирад ХIурматла Грамотабачи лайикьрикибси сари.

Илди жагати хьунул адамти ва лебилра дурхIнала анхълизи бузути хIянчизартира халкьани-ургабси хьунул адамтала байрамла БархIиличил мубаракбирулра, чула гIямрулизир ва бузерилизир сархибдешуни диаб, дурхIначи гьатIира гIяхIси хIеруди бирахъес дигира, сабурра имцIадиаб!

C.ГIябдуллаева