…2025 ибил дусла цаибти бурхIназир Дагъиста телевидениела каналличир гьарил миллатла вакилтала далуйтала ва делхъанала шайчирти устадеш чедиахъули лерри. Бархьли бурасли, наб гIяхIхIедизур, далайчибала куц-кабиз гапдаресли хIедиъни ва далуйтира имцIатигъунти урус мезличил диъни сабабли.
Гьайгьай, урус мезличи нушала сегъуналра къаршидеш биэс асухIебирар. Амма вегIла миллатла мезла хIурматбарес хIебални – халаси гIяйиб саби. Ил багьандан дебали гапбареслири Зульфия Ильясовани шадлихъличиб нешла мезличил сари акIубси Ахъушала районнис багъишлабарибси далай зайбухъахъни.
Дила неш рикIусири (бунагь-хатIа урдуцаб сунела) «Наб Зульфия дигахъуси далай багьанданцунра ахIен, наб ил гIяхIрилзуси сари бахъ жагали кIана чебяхъес балухIели». Илди гъай уркIиличи дакIиб сагал дуслис хасбарибси балбуцличи цалабикибти жавабла къуллукъуначиб бузуталара балли куц-кабизличи хIеррикIухIели: цабехIтала гьарглири къакъ, кIиэстала – хъуцIруми, хIябэстала кьяшми.
Зульфия Ильясова дурарухъун къугъаси, сунечи балбикибси дарган хIеваличил, бекIличиб жагаси шиниша кIанара лебри. Гьандикиб 1990 ибти дусмала ахирлизир адамтачирти декIар-декIарти къиян-жапа, челябкьлаличи умут камбиубси замана. Дебали хIяжатлири итхIели уркIилизи разидеш бихути анцIбукьуни, чулира заманалис биалра гIямрулизирти масъултачирад пикруми гьарахъдиркахъути. Илдигъунтили детауртири Зульфияла концертуни. Илдачи бахъал адамти башутири. Бахъал адамти башнила сабаб далайлизибцун ахIенри, далуйтира сецад уркIилизи духIнадерхести, пикруми шаладирути диалра (масала, ХIямид ХIямидовлис ва цархIилтира даргала миллатлизизибадти машгьурти адамтас багъишладарибти).
Зульфияла концерт – итхIели ил сабри адамтала уркIбази разидеш ва гIямрулизи шаладеш дихуси байрамгъуна, жагIялла бархIиличи умут алкIахъуси гIямрула къугъаси анцIбукь. Концертличи башутас гIяхIдилзутири жагали балкьаахъурси сцена, далай бучIусиличир миллатла жагати палтар. Сунечи хIербикIес ва лехIяхъес бакIибтала, сунела миллатла адамтала хIурматбарес балнила лишан сабри ил. Илгъуна баркьудилис Зульфия гьаннара, гъал дусла гIергъира, марли кавлули риънилис бикьридеш дариб, ил шадлихъли лебтазирадалра декIаррухънили.
З. Ильясова Ахъушала районнизи ва сари акIубси Гьебала шилизи гьаман рашули рирар, ишар детурхути шадлихъуназир бутIакьяндеш диру – Чедибдешла БархIилис хасдарибти ва цархIилтира. Гьаларван ракIиб Дубримахьила шилизи тIабигIятла газ сабукнила хIурматлис бетерхурси балбуцличи.
Ишдусла январьла 3-личиб Дагъиста радиола даргала редакцияли бируси передачаличи лехIирхъули калунра, сабира Зульфия Ильясовас багъишлабарибси. Ил передачализибад багьурра, республикализир машгьурси культурала хIянчизар, хIурматла умира, грамотабира, Баркаллала кагъуртира касибси Зульфия Ильясова, сарира вецIну хIябраэсил дус МяхIячкъалализибси дурхIнала искусствобала школализир директорли рузуси, сунела районнис, миллатлис, республикалис кьяйдали, арагIебли Россиялис – сунела ВатIайс мардеш чедиахънила баркьудилизир декIаррухъи риъниличила. СВО бехIбихьибхIейчирад Зульфия Ильясова бургъантас кумеклис дахъал секIалра духили, сунела пагьмуличилра разибирули, илди мер-мусаличи гехIна рякьи сари! Гъабзадеш ва чIумадеш ахIену илди – хьунул адамлизирти. СВО-ла бутIакьянчибас кумеклис арц дурчуси фонд адихьибхIели, ила арц кабихьибси кIиибил адам Зульфия Ильясова руили сари.
Баркалла биаб, хIурматла Зульфия, адамдешла, яхI-ламусла баркьудлумас, миллатла хIурмат чеахъбурцнилис, адамтала уркIбази разидеш бихнилис! Баркалла биаб Наида Гъуруевасра – хIугъунти адамтачила бурес шакрикнилис! Шаласи, разиси, даршуси биаб хIушабра, лерилра нушабра 2025 ибил дус!
П.Маллаева
