Дагъистан, Россияла дахъал миллатунар республика сабливан, культурабачибли, миллатуначибли ва мезаначибли декIарбулхъули саби. Мезани мяхIкамдирнила ва гьаладяхI дашахънила масъала дусличи-дус аргъбаибсили ва мягIничебсили бетарули саби. Буралли, дубурланти шагьуртази гечбирнилира нешла мез мяхIкамдирниличи вайси асар бирули саби. Шагьуртазиб жагьилти урус мезличил гъайбикIнила сабабли, багьла-багьлали нешла мез детихъули сари.
Мез мяхIкамдирнилизи ва илди жагьси наслуличи диахънилизи белгиси пай кабирхьули саби нушала газеталира. Газетализи макьалаби лукIути корреспондентунала дурабад, социальныйти сетаназиб ил гьалабяхI башахъуси SMM-специалистра лерси сари: телеграм-канал, ВКонтакте, Одноклассники. Технологияби хъярхъли гьаладяхI дашуси замана SMM-менеджерла санигIят дебали машгьурбиубли саби. Гьаннала заманала наслули миллатла мезличил дурадулхъути газетаби-журналти дучIули ахIен, илдани халаси замана телефонтазиб саби буркIуси. Нушала специалист Эльза Чубановани социальныйти сетаназиб газета бучIантас гIяхIбизесли, хаслира жагьилтази нешла мезличи пикри битIикIахъесли, декIар-декIарти видеобачил ва суратуначил дебадарили, Интернетла бяхIянази постани гьаладирхьу. Илкьяйдали сагати адамти битIакIес ибси мурадличилра конкурсуни, хьарбаудуни дурадуркIули рирар. Илини республикализир дурадуркIути нешла мезлис, культуралис, гIядатунас хасдарибти декIар-декIарти далдуцуначир жигарла бутIакьяндеш диру, тамашала видеоби-суратуни кайсу, гIядатла адамтачил ихтилатуни дурадуркIу.
Мез мяхIкамдирнилизи пай кабирхьни багьандан халкьани-ургабси нешла мезла БархIи ДР-ла Халкьла Собраниела Председатель Заур Аскендеровли Эльза Чубановас Баркаллала кагъар бедиб. «Сабухъчерли рузули, ДР-ла халкьла мезани мяхIкамдирнилизи белгиси пай кабирхьни багьандан Дагъиста Халкьла Собраниели баркалла балахъули саби. ХIед чIумаси арадеш, хъулиб баракат дулгулра, пикруми-кьасани детерхурли дигулра», — белкIи саби кагъарлизиб.
Нушала Эльза илгъуна разиси анцIбукьличил мубаракрирулра ва илис гьаннала гIергъира дахъал сархибдешуни дулгулра!
ПатIимат Мирзаева
