Дургъби тIашдизаб
ХIушаб лагьни урцахъес,
Мадараб хIярхIбала заб
ХIуша демхIхIедемхIахъес.
Саби гIяхIъулали дургъбази арбашути гIяхIгъубзначила, илдани чедиахъути гьунартачила халкьли дучIути назмуртани ва цархIилти белкIанани адамличи дебали халаси асар бирули саби.
ХIера, ишхIелла манзиллизиб, бикIуливан, гIяхIгъабзала хIял балуси замана – тяп илдигъунти багьадурти хIяжатли саби нушала бахъал миллатла вакилти хIербируси улкалис.
Гьанна Украинала мер-мусаличиб бетурхуси дявила хасси балбуцлизир бутIакьяндеш дирути асил уршби камли ахIен нушала ГIяялизимахьила шилизибра, чулира дергъла майдайчир яхI, ламус, игитдеш чедиахъути. Душмайс къаршидеш дарес дяхI-дяхIли дурабухъес хIядурти, ВатIан багьандан гIямру кьурбандарес гIелумхIебилзути гIяхIгъубзни саби илди. Илдигъунти-ургав бегI гьалав гьанушес вирар Асилдешла 2-ибил даражала орденничи, Гъабзадеш багьандан медальличи лайикьикибси Идрисов ГIяли ГIябдулманапович. Буралли, илини жигарла бутIакьяндеш дарибти сари Сириялизир кадикибти дявила анцIбукьуназирра. ВатIан балтахъанна Дус сабливан, иличила ва дявила гьунчир илини дакIударибти игитдешличила белкIес хьулрухъунра.
ГI.Идрисов акIубси сай 1985 ибил дусла сентябрьла 4-личив Лавашала районна Кьакьамахьилизив. Идрисовхъала хъалибарг гьаланачи илаб хIербирутири – школализиб бузули. ГIялини 7 класс ил шилизир тамандарили гIергъи, 1999 ибил дуслизиб сунела бегIтала шилизибси школализиб белчIуди даимбариб. ГIяялизимахьила урга даражала школа гIяхIти кьиматуначил таманбаресра бажардиикиб. ГIур МяхIячкъалализибси финансовый техникумлизи керхур. Илаб белчIуди хъараахъурли гIергъи, гIярмиялизиб къуллукъбарес (2 дуслис) арякьунсири. Багьудлумачи гъаргъси уршили, белчIуди институтлизибра даимбарибсири (правовое академиялизиб).
ГIялис ВатIайс къуллукъбирнила санигIят гIяхIбизур ва, вягIда хIясибли, Кемерово шагьарлизибси дявила училищелизи керхур, командиртала курсани делчIун. Ил Читализи, Улан-Удэлизи узахъес вархьиб. Севастопольлизир биалли, ГI.Идрисовли гьаланачи взводла, гIур отделениела командирла къуллукъуни дузахъулри. Ил старший лейтенантла званиеличи айкиб. Сунени бируси хIянчи ункъли балуси ГIяличи ротала къуллукъуни хъардариб. 2018 ибил дусличирад разведкала взводла командирла къуллукъуни дузахъулри илини.
2021 ибил дуслизив ил Новочеркассклизив командировкаличив сайри. Улкализиб паргъатдеш буунхIели, Украинализиб бетурхуси дявила хасси балбуцлизиб саби гIяхIъулали бургъес аркьутала кьукья цалабяхъиб, ва ГIялира илдачил варх балбуц бетурхуси мерличи арякьун. Дявила хасси балбуц бехIбихьибхIейчирад, дявила кьукьяла командирла къуллукъуни дузахъули сай. Илини бекIдеш дируси кьукьялис, лебси мерличибад къаршикарти гьабяхъес ва къяббердни агарли бархбас (связь) бузахъес имканбакIиб. Чуйнара бяхIяэс кьадарбиуб душмантала хIярхIубала цIала гьужум. Ил ункъли бажардивикиб сунела бургъантала ургар детахълуми хIедиахъубли, къаршикарти гIела дянгаэс.
Дявила хасси балбуц бетурхуси мер-мусаличир – Авдеевка, Бахмут бикIути ва цархIилти — ГIяли Идрисовличи хъардарибти дявила хъарбаркьуни гъабзадешличил, халати жавабкардешличил ва чедетаахъили тамандарни багьандан, ил Гъабзадешла орденничил шабагъатлавариб.
КIинара-сера сунела ахIесри шилизи вакIиб, зягIипикибхIелира, отпускличира. Хъулив узи-уршиличил, сай учIули калунси школализив мугIяллимтачил ва дурхIначил гьуниваиб. Гьалабван илис имканбакIиб Севастопольлизибси сунела дигуси хъалибаргличи 10 бархIилис укьес.
ГIялила кIел рурси леб. Халасигъуна Луара 5-ибил класслизир ручIули сари, риштIасигъуна Марьям – дурхIнала анхълизи рашули сари. Рурсбала неш Идрисова Аминат Залкеприевна больницализир гинекологияла отделениелизир заведующаяли рузули сари.
ГIе, марлира, нушала ВатIан гъармукабазибад балтахъути бургъантас хъалибарг бегIлара бекIлибиубси хъарихъ саби. Хъалибаргли саби илди дергълизиб уркIичеббирутира, илдала гьав ахъбурцутира ва нушала челябкьла багьандан бургъахъес цIакьани имцIадирахъутира.
Ишгъуна ца мисал гьанбуршис. Севастопольлизибад бургъантас бархьибси кумекличил барх 58 ибил школализибадси посылкализиб сунела рурси Лаурала кагъар бакIибхIели, ГIяли Идрисовла разидешлис ахир аги…
Илдигъунти дирхалачерти хъалибаргуни, къакъбяхъести вегIла халкь, шанти лебхIели бургъантас улкала гьалаб чула чебла ахъес багьандан кункдеш алкIули бургар.
ХIу учIахъули калунти мугIяллимтас, шантас, хIура хIечил бургъутира ара-сагъли, Чедибдешличил хъули чарбухъи уркIи-уркIилабад дигули саби. ХIу нушала пахру сайри, ГIяли, дила урши Исламла узигъуна юлдаш, цакласслан.
ВатIан гьанни дурабухъунти лебилра асил уршбала гьалаб икрамбирулра!
Зубалжат ЖабрагIилова, ГIяялизимахьила школала мугIяллим
