Ишди бурхIназиб Бутрила шилизибси урга даражала школализиб халкьани-ургабси нешла мезла БархIилис багъишлабарибси «Дарган дарган вирару, дарган мез хIедалуси» уличилси шадлихъ дураберкIиб.

Шадлихъ бузахъулри Бутрила шилизибси урга даражала школализир нешла мезла ва бехIбихьудла классунас дурсри кадирхьуси, пагьмучерси МяхIяммадова Эльмира ХIяйдаровнани.

Балбуц адамтала жигарла бутIакьяндешличил бетерхур. Илаб лебри: культурала управлениела хIянчизарти,  Бутрила шилизибси библиотекала заведующая ХалалпатIимат ИсмягIилова, культурала Центрла руководитель ХIялимат Ражабова, шила культурала Юртла директор Зубайдат ГIялиева ва цархIилтира. ХIялимат Ражабовани руркъути рурсбани жагати делхъ дариб, бучIантани даргала машгьурти писательтала, поэтунала назмурти делчIун. Эльмира ХIяйдаровна Бутрила шилизибси школализир 25 дус рузули сари. Илини шила халкьла, сари рузуси коллективла ва бучIантала ургаб халаси хIурмат сархиб. Сунечил барх бузути иличила дебали гапбикIули саби: «Духуси, дигичерси, бархьдеш дигахъуси, черетаибси, бучIутази багьуди касахъес ва сунени кабирхьуси предметличи диги адикьес багьандан халаси къайгъи бируси, школала гIямрулизир жигарла бутIакьяндеш дируси, школализиб дурабуркIуси балбуц бетерхахъес бажардилизир риркур».

Эльмира ХIяйдаровнани сунела гIямрула вархкьячил  хIябал урши-рурси абикьули сари, гIяхIси бяркъра бедили, багьудира касахъили, халатала хIурматбирахъес бурсибирули.

Гьаннала гIергъира сунела гIямрулизир, бузерилизир сархибдешуни ва нешла мезличи диги имцIадикIаб!

С.ГIябдуллаева