Ишди бурхIназиб экскурсовод, гид Мусаев Муса Шабановичли «Ахъушала район» МО-ла туризмала шайчибси управлениелис гьуни чебиахъуси ХIясанов ХIясан МяхIяммадсягIидовичличил ва илавси бекIливиубси специалист Кьурбанов Мурад МяхIяммадовичличил барх Ахъушала районнизи багьахънибалашалси архIя дураберкIиб. Ил балбуцлизир бутIакьяндеш дариб 17 гид-экскурсоводли.

Ахъушала районнизи бухIнабулхъухIели, «МухIела майдайчи» гьаббакIиб. КIинайс илди бякьун Тахо-Годила уличилси ДР-ла миллатла музейла филиал, тарихла-краевдческий музейлизи. Илис бекIдеш дируси Мирзаева Зубалжат ХIусейновнани илдас экскурсияра дураберкIиб, музейлизир хIябал азирцад экспонат лерниличила буриб. Илдазирад дахъалгъунти «Археология», «Палеонтология», «Миллатла палтар» ва цархIилти отделтазир дихIути сари. Музейла пахру сари усишала някьишла ваяхI, шел азир дус биубси берхIила календаль, жявхIелила хIелхъала журала бялихъла – ихтиозавра къалип, исла.

ЖявхIелила адамти хIербируси «ГIянихъяб» бикIуси мер чебаили гIергъи, экскурсоводунала архIя ХIябшимала шилизиб даимбиуб. Илаб илди культурала букьурла объектунили сарти, мижитлизи, къуббализи бякьун.

Уста Зугьра ИсмягIиловани хайдакьла някьишла шайчиб устадешла дарс чебаахъиб, илди дирнила тарихличила къантI-къантIли буриб, гьарил бибгIянси къиликъла мягIнара гьаргбирули.

Балхъарла шилизи аркьухIели, илдани Шукьтила шарара чебаиб. Шукьтила ши дебали жагабарибси саби илавадси Чартаев МяхIяммад Абакаровичли (1941-2001-ибти дусми) сунела шантас цагъунти, шалати юртани тIашдатурли. Ил шилизи урчIемцIали ибти дусмазиб улкала декIар-декIарти мераначибад бахъал журналистуни, совхозунала ва заводунала директорти, мугIяллимти бакIибтири, «Шукьтила шара» бяркъес багьандан.

АрхIяла ахирласи мерли бетаур Балхъарла ши. Илаб гIяхIли гIянжила гIягIниахълуми дируси цехлизира бякьун. Устнани биалли илди балхъарла гачла ваяхI дирнила шайчиб устадешла дарс чебаахъиб, илкьяйдали дарибти цархIилти матяхIра гьаладихьиб.

«Ахъушала район» МО-ла багьахънибала политикала шайчибси управление