Гъамли, февральла 23-личиб бетурхуси ВатIан балтахъанна байрам ишдуслизиб гьатIиралра мурхьси мягIна бухIнабуцибсили бетаурли саби или гьанбиркули саби.
Ишдус нушала улкала Президентли ВатIан балтахъанна Дус сабливан багьахъурси биъни багьандан, итира лебси ВатIан балтахъанна БархIила байрам нуша лебтасалра кIиркали дурхъасили бетаур. Ил бархIилизибцунра ахIи, арагIебли дуслизибра нушала асил уршбачила, гъабзадешчебти бургъантачила, илдала баркьудлумачила гъайдикIес, чеалкIуси наслулизи гIибрат кайсахъес багьандан зума-зумали илдачила гьанбиркахъес дирехIе. ИшбархIира нуша дузахъес, даршули хIердиахъес илди душмайс дяхI-дяхIли къаршидеш дарес дурабухъи саби.
ВатIайс марти уршби абикьурси Сергокъалала районнизибадра камли ахIен бусягIятла замана бетурхуси дявила хасси балбуцлизир бутIакьяндеш дирути-ургабра. ИшбархIи наб бурес дигулра илдали гьаларти къяяназивси, Мяммаулла шилизивадси ХIясбанов Анвар МяхIяммадовичличила.
Илала биографиялашалти баянтачи хIерризурхIели, гIядатла хъалибарглизив акIубси, Ставропольлизибси Северный Кавказла федеральный хъулри лушнила университет таманбарили, «Строительство» бикIуси бяхIчибиз хIясибли санигIят касибси жагьил уршила севан дявила къуллукъ касес иштяхI акIубсири ибси суал акIуб. Амма итмаданал дила нуни жаваб хIядурбарира: сенахIенну нушала дубурлан уршби алкIу-алкIукад чула мер-муса ва гъамти багьандан мурталра гъазализи каберхес хIядуртихIели. «Гьу!» ибхIели, «ХIяйт!» или, дурабухъес хIядурти, цIала тIякьгъунти гъубзни бикIаргу халкьлизиб. Илгъуна сайли увухъун нушала Анвар ХIясбановра.
БелчIуди хъараахъурхIели, гIярмиялизи арукахъес военкоматлизи дугьаизур. Ил Калининградлизиб гIярмиялизиб къуллукъбирули калун, кIинайс биалли, вягIда бигьи, дявила къуллукъличил сунела гIямру дархдасахъес кьасбариб. БусягIятла замана ил дявила дивизияла командир сай.
Илини гьанбиркахъуливан, Украинала декIар-декIарти мер-мусаличир детурхути дявилати анцIбукьуназир Анвар ХIясбановлис бутIакьяндеш дарес кьадарбиублири. «Харьковла областьла Шевченково бикIуси шилизира мерладиубтири нуша. КIинайс Лебяжье бикIуси шилизиб гьужум бетерхурсири. Илизир нушала бургъантани гъабзадеш чедаахъиб. Балаклея шагьарлизибси ца пулан школа госпитальличи шурбатурли, ила арадеш къулайбиахъес юлдашуни бикули-арбикули дашес чебуркъуб. Отпускличи хъули чарухъес гьалав биалли, Курскла областьла Суджа бикIуси шагьарлизир детурхути дявила гьужумтазир бутIакьяндеш дарибтири», — бурули сай А.ХIясбановли.
Шилизи вакIибси ургъанничил школала бучIанти гьунибаиб. Анварлис биалли, сунела ахIерси школализи гьаввакIес, мугIяллимтачил ва дурхIначил гьуниваэс дебали дигеси анцIбукьли уббухъун.
Гьарил сунела баркьудиличи чекайзурси А.ХIясбановли алавтазирадра бируси хIянчилизир жавабкардеш тIалабдирули дирар. Сунела бекIдешлиубти бургъантазира дявилашалти устадеш гIерисахъули, гьала тIашдатурти мурадуни, чули бирусигъуна цIакь харжбарили, гIягIниси тяхIярли детерхахъес къайгъибирули саби ишбархIира илдани.
Украинала мер-мусаличиб бетурхуси дявила хасси балбуцла бекIлибиубси мягIна иргъули, душмайс къаршидеш дирес даимбиубти нушала асил уршби Чедибдешличил чула ахIерти хъалибаргуначи жяв-жявли чарбухъи дигулра. Илкьяйда бетарниличи халаси умутра леб!
Салимат ГIялиева
