Украинализиб бетурхуси Россияла дявила хасси балбуцлизир бутIакьяндеш дируси гьарил цаванзалан нушала пахру сай. Илдачи пахрухIебарес вирару ишбархIи илдани нушала улкала хъархIерагардеш, тарих ва хала бегIтала игитлати гьунартачила гьанбикуни далтахъули, миллатчидешлис чIумати къаршидеш дирули диалли. Улкалис ва дявила хъялис марти адамтала нушани халаси хIурмат бируси саби.
ИшбархIи нушала бургъантани сагаси тарих алкIахъули саби, илала бяхIяни игитлати гьунартани дирцIахъули. Гьаннала заманала игитуназивадси сай Сергокъалала районна УбяхI МулебкIила шилизивадси СВО-ла бутIакьянчи Арсен ХIясайниевра. Илини сунела гьала тIашдатурти дявила хъарбаркьуни ункъли тамандирули, хIурматличил дявила чебла ихъули сай.
Арсен ХIясайниевли УбяхI МулебкIила администрациялизи кабурхуси ЦIурмахьила школализир бехIбихьудла классуни хъараахъили, УбяхI МулебкIила урга даражала школализир 5-8 класс тамандарибтири. Школализив учIути дусмазивал Арсен спортлизи ахъибсири. Спортлизир гIяхIти хIясилти чедиахъни тренертани хIясиббарили, белчIуди даимбарахъес ва тренировкабачи вашахъес ибси мурадличил Сергокъалала ПТУ-лизи шурухъахъес тиладибарибсири. ПТУ таманбарили, Арсен ВатIа гьалабси чебла ахъес гIярмияла къяянази арякьун. Гьаланачи Дальный Востоклизиб дазу балтахъутала (погранвойска) гIяскуртазиб, кIинайс – Рязань шагьарлизиб дявила-гьавала гIяскуртазиб къуллукъбариб. ГIярмиялизивад чарухъунхIели жагьил адам МВД-лизив узес вехIихьиб, кьанниван Новороссийклизиб милицияла школализир хасти багьудлуми касиб. Дявила гьуни асилдешличил ихъни багьандан ил гIяхIцад медальтачи лайикьикиб, майорла уличи айкиб. Илдала лугIилизир «Милицияла отличник», «Росгвардияла отличник» михъирличи диршути лишанти, «Дявила анцIбукьунала ветеран» бикIуси медаль ва цархIилтира.
А.ХIясайниевли республикализир детурхути спортла абзаначир жигарла бутIакьяндеш дирули, гьаларти мерани кайсутири. Илкьяйдали Москвализиб бетерхурси лебил Россияла халкьани-ургабси абзличирра бутIакьяндеш дарибтири. Азадли мушулбашнила шайчив спортла мастерла кандидат, някъ-някъла дявила (рукопашный бой) шайчив спортла мастерла кандидат ветаур, гIяхIцад медальтачи ва грамотабачи лайикьикиб.
А.ХIясайниевли республикализиб даршуси аги гIеббурцули, хIиллабачи къаршили дурадуркIути далдуцуназир (КТО) чуйнара бутIакьяндеш дарибтири.
Украинализиб Россияла дявила хасси балбуц бехIбихьибти бурхIначибадал Арсен ХIясайниевли бутIакьяндеш дирули сай ва нушала улкала хъархIерагардеш батахъес, лерилра цIакьани дяхIчииули сай. Илини сай ВатIа марси урши ва дявила халати устадеш лерси ургъан сайливан чебаахъиб. Дявила чебла ихъули, СВО-лизир гъабзадеш дакIударни багьандан, Арсен «Гъабзадеш багьандан» ибси пачалихъла медальличил шабагъатлаварили сай.
2023 ибил дуслизив улкала тах шагьарлизиб гьар дус дурабуркIуси Чедибдешла парадлизир бутIакьяндеш дарахъес живарибсири. Илкьяйдали А.ХIясайниевли «Игитла парта» бикIуси лебил Россияла балбуцлизирра бутIакьяндеш дарибти сари. Сай учIули калунси ЦIурмахьила школализиб илала хIурматлис парта абхьиб. Хасси балбуцла мурад саби чеалкIуси наслулизи чула шантала гъабзадешличила балахъни ва улкала тарихла хIурматбирахъни.
ДурхIназир ВатIайчи диги адилкьнила баркьудилизир жигарла бутIакьяндеш дирни багьандан Арсен ХIясайниев «Дагъиста хIурмат ва асилдеш» бикIуси медальличи ва «Дагъиста халкьла игит» ибси уличи лайикьикиб.
А.ХIясайниевли кIел урши абилкьули сай. Илдира дудеш кьяйдали спортлизи ахъили саби.
Февральла 23 Арсен ХIясайниевлис ВатIан балтахънила БархIицунра ахIен, ил сай акIубси бархIира саби. Чесадиути байрумтачил Арсен уркIи-уркIилавадли мубаракирулра. Илис чIумаси арадеш, эркинти гIямру ва дунъяличиб паргъатдеш дулгулра.
БахъбикIабгу хIугъунти
Улкала багьадурти,
МулебкIан яхI буцили
Бурги ахъли башути.
ВатIайс къияндикалли
ЛямцIла цIаван биути,
Дахъал гъай хIедарили,
Душман агарвирути.
ПатIимат Мирзаева
