Нушала Дагъистан сунела тIабигIятла жагадешличилцун ахIи, гIяхIгъубзнала гьунартачиблира машгьурси саби. Сергокъалала районнизибра леб Россияла Игитла, Дагъиста халкьла игитла умачи лайикьбикибти асилти уршби. Улкалис къиянси замана, илис кумекбарес, халкь паргъатли хIербирахъес дявила балбуцлизир бутIакьяндеш дирути гъубзначи бегIтани, шантаницун ахIи, лебил Россияла халкьлира пахрубиру.
ИшбархIи нушала белкI Сергокъалала районна Мяммаулла шилизибти, ВатIайс марти хIябал узичила саби.
Рашид Нуцалхановла ва Мисай ГIяббасовала хъалибарглизиб авал урши ва ца рурси леб. Халалгъуна урши МяхIяммадтIагьирли Украинализиб дурабуркIуси дявила хасси балбуц бехIбихьибхIейчирадал илизир жигарла бутIакьяндеш дирули сай.
Ил гьунартас, хъарбаркьуни детурхахъухIели дакIударибти гъабзадеш багьандан, РФ-ла оборонала Министерствола медальличил ва Суворовла уличилси медальличил шабагъатлаварибси сай. Амма душма хIярхIуби мурталра ламартлатили урдулхъули дирар. ГIяхIгъабза дарган уршилис, кIинайс вяхъибхIели, заманалис хъули, сунела ахIерси шилизи чарухъес кьадарбиуб. Илала някъби дяхъурбазирад тамай сагъдиубли хIедиалра, гIуррара сунела бархтачи укьес хIядурикIули сай. ХIера, сегъунти дигил асил уршила ВатIайчи? Халкьла кьисматличила пикривикIуси гIяхIгъабза улкалис къияндикибси замана паргъатли уэс вирару? Юлдашунала мякьлав вагьариэс, илдас вирусигъуна икьалабарес гьуцIли саби гьанна МяхIяммадтIагьирла уркIира.
МяхIяммад Нуцалхановра Сириялизир детаурти дургъбазир бутIакьяндеш дирули калун. Илдала узи Мурад, Смоленскла дявила Академия таманбарили, нушала пачалихълис кумек хIяжатбикибхIели, ил гIеббуцес итмаданал музаухъун. Гьанна илинира СВО-лизир бутIакьяндеш дирули сай.
Халасигъуна узичибад гIибрат касибтиван, гIергъити узбанира чула кьисмат дявила къуллукъличил бархбалсахъули саби. Бурхбалсахъулицун буули ахIенну, санигIятлашалти къуллукъуни тамандирухIели, урехиагардеш ва игитдеш дакIудирули, пачалихъла хъархIерагардеш балтахъули саби. АлкIалли дарган уршби, алкIаб тяп илди хIябалра узигъунти, цIализира шиннизира бухIнабухъес гьалакти, адамтала гIямру дерцахъес къалабати.
Илдигъунти ВатIайс марти, улкалис багалати гIяхIгъубзни абикьурти ва бяркъурти дудеш Рашидлисра, неш Мисайлисра халаси баркалла биаб. Нешла уркIилис дигуливан ара-сагъли, жагали уршби Аллагьли мяхIкамбараб ва Чедибдешличил чула хъалибаргличи чарбухъахъаб. Амин!
Басират ХIяжимурадова
