Ахъушанти гIяхIялдеш дарес балути, хала бегIтала гIядатуни чекабизурли дузахъути аслуми-минала даргантицун ахIенну, бузерила машгьурти зяхIматчибира, асилдешличил ва ВатIайс мардешличил бургъути гIяхIгъубзнира саби. ХIера, тяп илдигъунти сабхIели, чула халаси хIурмат бирниличила буриб ишди бурхIназиб Ахъушала районнизи бузерила архIяличил вякьунси Дагъистан Республикала Правительствола Председатель ГIябдулмуслим ГIябдулмуслимовли.
«Ахъушанти дебали бузериличи дигичебти, гъабзадешчебти ва азаддеш дигахъути адамти саби», — буриб илини муниципалитетла администрациялизи цалабикибти гIяхIлала ва шимала бургала гьалав гъайулхъули.
…Сут бархIи савли, Ахъушала районнизи бузерила архIяличил дураухъунси ДР-ла Правительствола Председатель ГIябдулмуслим ГIябдулмуслимов Лавашала районнизира гьаввакIиб, илабси шила хозяйствола сагаси объектла бузериличил тянишиуб. Иличил барх лебри цаибил вице-премьер Руслан ГIялиев ва хIукуматла органтас бекIдеш дирути. Илдани 2024 ибил дусла ахирлис бузесаибси овощуни мяхIкамли дихIуси мер хIербариб. Буралли, 2030 ибил дуслис илар дихIути духълумала кьадар хIяйнали имцIабиахъес – 250 азир тонналичи абаахъес пикрибарибси саби.
Ахъушала районнизив, МухIела къуббабала гьалав премьер-министрлис гьуниваиб муниципалитетла бекI МяхIяч ГIябдулкаримов. Илаб хIурматла гIяхIяйс миллатла хурегунала тIем багьес ва районна тарихличила баянти аргъес имканбакIиб.
Районнизи ваибмад, ГI.ГIябдулмуслимовли «Гьанбикунала анхъ»-лизибси дявила хасси балбуцлизиб алхунти бургъантас хасбарибси памятникличи вавни кадихьиб. Ил анхълизир бургъантала хIурматлис жура-журала галгубала 250-йчирра имцIали мархIя удатурлири, скамейкаби кадизахъурлири, шаладеш биахъес чиргъми даршилири. «Гьанбикунала анхъ» 2024 ибил дусла майла 9-личиб абхьибсири. Алхунти бургъантас хасбарибси памятникличи вавни кадирхьнила балбуцлизир илкьяйдали бутIакьяндеш дариб Ахъушала районна бекIлира, министерствобас бекIдеш дирантанира, юнармейцыбанира, районна школабала бучIантанира ва мерличибти адамтанира.
КIинайс премьер-министр ва иличил бархси делегация Ахъушала районнизибси миллатла культурала «МухIела майдан» бикIуси сагаси комплекслизи бякьун. Ил мерлабиубли саби МухIела къуббабала мякьлаб. Музейлизир гьаладихьилри дубурлантала миллатла культурала матяхI, бекIахъудила гIямрулизир пайдаладирути ва някъли дарибти ваяхI. Миллатла культурала комплекслис бекIдеш дируси Муслимат МяхIяммадовани буриливан, илди мер-мусаличиб гъамси заманализиб гIяхIлас хасбарибси юрт тIашбалта. Проектла сиптакартани музей даимбируси цагьатIи сагаси объект акIахъес пикрибарили саби. ГIябдулмуслим ГIябдулмуслимовли илгъуна мягIничебси проект гIямрулизиб бетерхахъес бузутас баркалла багьахъур, илала кумекличил туризм гьалабяхI арбукес, Дагъиста культура машгьурбарес имканбикIниличила аргъахъиб.
Республикала делегацияли Советский Союзла Игит Сумен Кьурбановла биштIаси ватIай сабси МухIела шилизира архIя дураберкIиб. Илар ГI.ГIябдулмуслимовли «Арадеш бихIнила бетуц гьалабяхI башахъни» бикIуси федеральный проектла дазурбазиб тIашбатурси участковая больница хIербариб. Медицинала учреждениела хIянчизартачил ихтилатбарили гIергъи, илдала бузерила шуртIрачил тянишиуб.
Ахъушала районна БурхIимякьмахьилизиб 2023 ибил дусла декабрьличиб абхьибси «ДурхIядешла дунъя» бикIуси дурхIнала анхъ чебаэсра гьаббакIиб. Сагаси дурхIнала анхъ биштIатас хIяжатти лерилра шуртIрачил гIеббуцибси саби: шалати хъулри, спортла зал, музыкала класс, медицинала кабинет, хIязла майдан ва цархIилтира.
Районна центрли сабси Ахъушала шилизи ваибхIели, ДР-ла Правительствола Председатель ЖумягI мижитлизи вякьун, Ахъушала районна имам ГIябдулла-хIяжи ХIяжимаргучевличил ихтилатикIули калун. Районна бекI МяхIяч ГIябдулкаримовли буриливан, районна имамли муниципалитетлизиб даршудеш калахънилизи ва аги-кьяйда къулайдирахънилизиб дебали халаси пай кабирхьули сай. КIинайс премьер-министрли ва иличил бархти хIукуматла органтала вакилтани Ахъушала районна жявхIелла мижитлизир дехIибала дариб.
Районна администрациялизиб республикала Правительствола Председательли совещание дураберкIиб, сунечирра Ахъушала район социальный бяхIчибизлизиб-экономикализиб гьалабяхI башахънила шайчирти масъулти ахъдуцибти. Совещание ибхьули, илини Дагъиста халкьла поэтесса Фазу ГIялиевала гъай гьандикахъиб: «Мякьи агарли, кьялуби хIедирар, мякьи – сунела ванза агарли».
ГI.ГIябдулмуслимовла гъай хIясибли, хъалибарг, ванза, миллатла мез, тарих, культура ва Дагъиста халкьла гIядатуни – илди сари адамла мякьи, хьулчни.
«Ахъушала районнизибад бахъал пагьмучебти ва машгьурти адамти дурабухъунти саби, чучира районна халкьлицунра ахIи, арагIебли Дагъистайра пахрубирути — илди саби ГIялихIяжи Ахъушинский, ДаудхIяжи Эфенди Усишинский, Хамис Казиева», — цIакьбарили буриб илини.
Ахъушала районна шила хозяйствола кьяли гьалабяхI арбукьниличилара гъай детаур илар. «Шила хозяйство вавалибяхъибси мер сабливан, Ахъушала районни гIяхIцад овощуни ва картошка дашахъули сари. Шила хозяйствола ванзурбала цахIнабси чIябар 170 азир гектарличи абиркули саби», — викIи премьер-министр.
Совещаниеличир илкьяйдали гьундурала, шими тIабигIятла газличил гIердурцнила аргъбаибти масъулти ахъдуциб. ЦацадехIти суалтала чебкад докладуначил гъайбухъун республикала министертсвобас бекIдеш дирутира: ДР-ла экономикала ва мер-муса гьаладяхI дашахънила шайчивси министр ХIяжи СултIанов, республикала арадеш мяхIкамбирнила шайчивси министр Ярослав Глазов, Дагъиста багьудила ва гIилмула шайчивси министрла заместитель ХIяжимурад МяхIяммадов, ДР-ла шила хозяйствола ва берк-бержла масанала шайчивси министрла заместитель Зураб Куччаев, Дагъиста культурала букьурти мяхIкамдирнила Агентстволис гьуни чебиахъуси МяхIяч Мусаев.
Совещаниела дазурбазиб, ДР-ла Правительствола Председатель ГIябдулмуслим ГIябдулмуслимовли декIар-декIарти кьялубазир сархибдешуни диахъубти ва сабухъчебси бузериличил декIарбухъунти шабагъатлабариб. ДР-ла Правительствола ХIурматла Грамоталичи лайикьикиб Ахъушала районна бекI МяхIяч ГIябдулкаримов. Район гьалабяхI башахънилизи мягIничебси пай кабихьни багьандан, ДР-ла Правительствола Баркаллала кагъурти дедиб: С.Кьурбановла уличилси МухIела гимназияла мугIяллим ПатIимат Кьурбановас, районна администрацияла багьудила управлениела начальник МяхIяммад КаримхIяжиевлис, С.Кьурбановла уличилси «Агрофирма» СПК-ла председатель МуртазагIяли ХIябибуллаевлис, «Ахъушала районна бекIлибиубси больница» ГБУ-ла дурхIнала отделениела заведующий МяхIяммад МяхIяммадовлис, меценат ГIиса ГIябдуллаевлис.
Дагъиста журналистикализи белгиси пай кабирхьни багьандан, ДР-ла Правительствола Баркаллала кагъарличи лайикьбикиб нушала «Замана» газетара. Газетала бекI редактор ГIябдуряхIман ИсмягIиловлизи шабагъат бедлугули, республикала Правительствола Председательли миллатла пресса гьалабяхI башахъес бамсриагарли бузуси газетала коллективлис уркIи-уркIилабадси баркалла багьахъур: «Республикала лерилра газетабазибад бегIлара гIяхIси формат – «Замана» газетала саби. Нешла мез лерилра секIайс гьалар дашар. Илкьяйдали гьаннала гIергъира хIушала издание гьалабяхI башахъеная». Илини лебилра цалабикибти газета къулбасбарахъес ва бучIахъес жибаресра хъумхIертур.
Совещание ахирличи бикибхIели, «Замана» газетала бекI редакторлис премьер-министрличил ихтилат дураберкIесра имканбакIиб. ГIябдулмуслим ГIябдулмуслимовли районничила сунела пикруми аргъахъиб ва лерилра бекIлидиубти масъултачила гьанбикахъиб.
Салимат ГIялиева, Рабадан БяхIяммадов
