Ишди бурхIназиб республикала халкьани-ургабси аэропортлизиб Nordwind Airlines авиакомпанияли 2025 ибил дуслизиб бетерхахъес пикрибарибси программала чебкад пресс-конференция дураберкIиб.
Балбуцличир Nordwind Airlines авиакомпанияла генеральный директорла заместитель Антон Маттисли, «Халкьани-ургабси аэропорт «МяхIячкъала»» АО-ла генеральный директор Николай Субботинни, ДР-ла транспортла ва гьундурала хозяйствола шайчивси министрла заместитель СягIид Рабазановли, илкьяйдали республикала СМИ-бала вакилтанира бутIакьяндеш дариб.
А.Маттисли бурни хIясибли, бухIнабси туризм гьалабяхI башахънила шайчиб гьаб-гIергъили кIел дус авиакомпанияли «Лучший межрегиональный перевозчик» номинациялизиб гьаларти мерани кайсули сари.
«Нушани 2022 ибил дуслизир МяхIячкъалала аэропортличил бархбасуни кадизахъурра. Рейсани 3 дусла духIнар 1536-личирад 2919-личи бикайчи имцIадиуб. Буралли, ДР-ла транспортла ва гьундурала хозяйствола Министерстволи нушаб халаси кумек гIеббиахъули саби – нушала программаби гIердурцули ва илди детерхахъес арц декIардирули. Илдала икьайчибли нушаб Дагъистайзи гIяхIцад рейсани абхьес имканбакIиб.
АрагIебли касалли, 2025 ибил дусла программализи 12 сагати рейс кадерхахъурлира. Илдазибадли ца саби Сургут – МяхIячкъала. Илкьяйдали, МяхIячкъалализибад бархьаначи Калининградлизи урцуси самолёт агни пикрили касили, Калининград – МяхIячкъала рейс абхьес пикрибарилра», — викIи ил.
«Нуша авиакомпанияличил дарх сабухъчерли дузулра ва Россияла лерилрара-сера шагьуртази рейсани ибхьулра, иличибли регионна туризма гьалабяхI башахъули», — аргъахъиб Н.Субботинни.
Nordwind Airlines авиакомпанияли ибхьути рейсанала гIяхIдешличибли дагъистанланти бархьаначи саби бузути яра хIербирути мер-мусаличи баэс ва республикализи чарбулхъес бирар.
ПатIимат Мирзаева
