Яни — цархIилти манзилти кьяйдали, дусли гьачам башуси бугIярси аргъла манзил саби. ДуцIрумла дуцIарти бурхIнас гIергъи лебилра яниличи хIерли бирар, хаслира — биштIати дурхIни. СенахIенну янилизиб биштIатас бегIлара дигуси дяхIи саби. Янила манзил нушани гIядатлибиубливан шимазир урцуйчил адилкьути печаначил, гъяймачиб кабулхъути дурхIначил, миъдяргIибти урунжуначил, сихIрула хабуртазиб кьяйдали, цIуба кьалтинни кIапIбарибси ванзаличил бархбалсахъуси саби. Амма нушани тамашала анцIбукь хIясиббирулра, яни шилизиб ва шагьарлизиб халаси декIардешличил башули саби. Сен декIарбулхъуси шилизибси яни шагьарлизибсиличиб? Янила аргъли шагьарра шира декIардарес секьяйдали балуси, шилизиб бируси дяхIи, шагьарлизиб сен хIебируси? МяхIячкъалализи ручIес ракIибхIейчирад дила бегIлара челукьуси суал ил саби. ГIе, шимазирра гьанна гьалар кьяйдали, халати дяхIила кIилкIми агара, дяхIила кайути хъулчри, дяхIилизирад умудирути гьундури рахли сари къаршидиркути. Селичил сарира илди дарсдешуни дархдасунти?
Гьанна кам-гьамси дяхIи баралра, биштIатасцунра ахIи, халатасра балли халаси разидеш саби. Къаршибиркур янила бугIярдеш хIейгутира.
БегIтазирад нуни илдани яни секьяйдали буркIутирил хабурти чуйнара дакьибти сари. Илдани янила манзил халаси разидеш чебиусири, гьар бархIи дяхIилизиб хIязтабиркьули. Сагаси Дусла байрамлис вацIализибад елка бихусири ва ил жагали баршили, шила дайла тIашбалтусири. Илар жагьилтани декIар-декIарти хIязани дирутири, далай-делхъличил, разили шадлихъ дурабуркIусири. Унруби, тухумти цаличи ца буркьунза башутири. ИлхIели янила бугIярси дуги печьлизир картошка дуцIули, набадури лухьули дири, гIинцби-хъярби дуцIи, дураб цIакьли бургъуси дягIли дишахъунти шалуби, гIяш-гIяшли дурути цализи цали хабурти… гIуррара дахъал цархIилти разити ва уркIи ряхIятбирахъути анцIбукьуни дирутири. Адамлис разидешлис гIур се биэс гIягIнили гьатIи? ИтхIелира излуми, халкьлис челукьути масъулти камли хIедурги, амма биалра, халкь цаличил ца уржили, шадибгьундурачи башули, разидешличил хIербирутири. ИтхIели гьаннаван техникала гIягIниахълуми хIедири, дусла авалра манзил лерилра хIянчи някъли дирутири, биалра, илдани цахIнабиркес замана бургусири. Гьанна адамти дебали барсбиубли саби. Сен илцадра жявли хъумартурти халкьли цаличил ца уржили хIербирнила гIядатуни, гIяхIялдешла, унрадешла бархбасуни? Сен? … Ахирагарти дила суалтас жавабти даргес, мажахIят, рииша…
Анжела Мутазова
