Гьаларван ГI.Кьадиевла уличилси спортла комплекслизир гIулухъаби-ургар азадли мушулбашнила шайчирти, Сергокъалала районна гьалабдеш багьанданти абзани детерхур.

Абзани хасдарибтири СВО-ла бутIакьянчибас. Илди дурадеркIахъес халаси икьалабариб районна администрацияла культурала, спортла ва жагьилтала къуллукъунала шайчибси отделли, ва илис бекIдеш дируси Камалудин МуртузагIялиевли.

Гьайгьайрагу, спортла илдигъунти далдуцунани кумекбирули саби жагьилти-ургар гьалмагъдешла бархбасуни дебадиахъес, спортла жураби машгьурдиахъес, республикализиб азадли мушулбашнила спортла бетуц гьалабяхI арбукес. Буралли, абзанани чеалкIуси наслулизир спортличи кьяйдали, ВатIайчи дигира адилкьули сари.

Балбуцличиб лебри районна бекIла заместитель Баркакьади Мажидов, СВО-ла бутIакьянчиби Шамил Рабазанов, Арсен ХIясайниев, халкьани-ургабси даражала спортла мастер ХIямид МяхIяммадов. Цалабикибти спортсментала гьалаб гъайбухъи, илдани абзанала бутIакьянчибас гьарбизуни далгун. Сунела яргализиб, Шамил МяхIяммадовли халаси баркалла багьахъур районнис бекIдеш дирантас, мурталра СВО-ла бутIакьянчиби гIеббурцнилис, даим илдала мякьлаб бирнилис. Балбуц даимбирули, Баркакьади Мажидовли районна бекIла шайзирад СВО-ла бутIакьянчибас савгъатуни дедиб, жамигIятла гIямрулизиб дявила хасси балбуцла бутIакьянчибани мягIничебси мер бурцниличила лебилра цалабикибтази аргъахъиб.

Абзаначиб чедибикибтира илди дурадеркIахъес кумекбарибтира «Стройхозмаркет» бикIуси туке шайзибад савгъатуначил, илкьяйдали медальтачил ва грамотабачил шабагъатлабариб.

Сергокъалала районна багьахънибала центр