Ишди бурхIназиб Дахадаевла районна администрациялизиб муниципалитетла руководитель МяхIяммад ГIябдулкьадиров депутатунала собраниела председательла заместитель ГIяхIмад Ибрагьимовличил ва КIишала шила СДК-ла директор МяхIяммадхIяжи ГIяхIмадовличил гьуниваиб. Гьунибаънила дазурбазиб СВО-лизир бутIакьяндеш дирути бургъантас кумек гIеббиахъниличила масъала хIербариб.
Илкьяйдали балбуцличир гъай детаур КIишала шантани чучи кумекбарахъес дугьабилзути бургъантас ВАЗ автомобиль асес багьандан арц цаладяхъес кьасбарниличила. Илгъуна пикриличи бакIили саби кIишанти бахъалгъунти бургъантани чула къуллукъуни ва санигIятлати хъарбаркьуни тамандарес багьандан саби-бегIти машинаби пайдаладирухIели. Ил багьандан илдас кумек гIеббаахъес хIяжатлира саби или иргъахъули саби илдани.
МяхIяммад ГIябдулкьадировли багьахъур: «Лерилра цадиубли, нушала ахIерси ВатIан балтахъанти гIеббуцес хIяжатси саби нушани. СВО-лизир бутIакьяндеш дирутас кумек гIеббаахъилицунра ахIи, нушани дявила майдайчибти илди гIяхIгъубзни рухIлашалра гIеббуцни мягIничебси саби. Автомобиль асес багьандан арц учидяхъни — ил гIяхIси сиптацун ахIен, ил кумекличи нуша музадухъес мурталра хIядурли диънила лишанра саби».
ГIяхIмад Ибрагьимовлира илгъуна сиптала мягIничебдешличила сунела пикри буриб: «ИшхIелла манзиллизиб нушала игитуни рухIлашал гIеббуцницунра ахIи, автотранспорт илдас пешкешбарнира кьадричебси баркьуди саби. Районна жамигIят жибирулра арц цаладирхънилизир бутIакьяндеш дарахъес ва нушала улкала хъархIерагардеш батахъес багьандан чузибадли лябкьуси барес кьаслизибти бургъанти гIеббуцахъес».
Районна администрациялизиб дураберкIибси гьунибаъни СВО-лизир бутIакьяндеш дирутас кумек гIеббиахънила сипта гIямрулизиб дурабуркIнила мягIничебси ганз саби. Илкьяйдали халкьла цадеш ва дунъяличиб даршудеш калахъес багьандан къарауйчибти багьадурти илдани гIеббурцни гIячихъбирули сари.
Дахадаевла районна администрацияла пресс-служба
