БусягIятла замана бетурхуси дявила хасси балбуцлизир бутIакьяндеш дирути нушала асил гъубзначил барх камли ахIен пергер исбагьибира. Чула жан ахIерахIедарили, илдани нушала бургъантала гIямру дерцахъес чули бирусигъуна кумек алкIахъули саби.
ЦацадехIти анцIбукьуназиб мурул адамтала булан гъабзадеш хIедиухIели, нартанази бухъести исбагьиби лебниличи уркIи пахрули бирцIули саби. Илдигъунти дубурлан рурсби рухIлашал дебати къалубиван нушаб гьалабилзули саби. ХIера, илдигъунтазирад цали сарси дарган рурсиличила бурес дигулра наб ишаб.
Гьалабван Хьар МахIаргила шилизибси библиотекализиб ВатIан балтахъаннис хасбарибси дус ибхьнила балбуц дураберкIиб. Ила жирарилри Украинализиб дурабуркIуси дявила хасси балбуцла бутIакьянчи МяхIяммадова Зайнаб ГIязизовна.
2022 ибил дусла гIебшниличирад рехIрихьили, СВО-лизибти нушала бяхъибти ва зягIипбикибти гIяхIгъубзни сагъбарес, илдала жан дерцахъес бажардилизирси медсестра Зайнаб МяхIяммадовас, къиянти тяхIяр-кьяйдализир урехиагарли, жигарчерли рузули нушала улка гIеббурцнилис, Дагъиста БекI Сергей Меликовли «Дагъиста халкьла игит» ибси у бедибсири ва Дагъиста игит зубариличил шабагъатларарибсири. Мурул адамтачил къяйли, нушала ВатIан дигахъни марбируси дарган исбагьила гъабзадешлис бикьридеш дирнила лишан саби ил.
МахIаргила шанталацун ахIи, Дагъиста халкьлара пахрули ретаурси МяхIяммадова Зайнаб ГIязизовнала хIурматбирули балбуцличи шила халкь цалабикилри, Сергокъалализибад Замира ГIямарова, Зайнаб Магьдиева, Рашидат Лукьманова бакIилри. Илди Зайнаб ГIязизовнала гъабзадешличи пахрубирули, илис баркалла балахъули ва гьарбизуни дулгули гъайбухъун. Ибрагьим ГIялибековли Зайнаб МяхIяммадовас сунени белкIунси назму белчIун.
ХIялимат Халимбековани бучIахъути уршбани ВатIайчила далуйти делчIун.
Бизити берклумачил столтира даршили, балбуц балкьаахъурси, библиотекала заведующая СултIанат Халимбековас цалабикибти баркалла бикIулри. Ил гьунибаъниличибти гьарли-марси сяхIбатличибван батбухъири. МяхIяммад Лукьмановли, ХIяжимурад Юсуповли, МяхIяммадрасул МяхIяммадовли ва культурала хIянчизартани далуйтачил цалабикибтала гьав ахъбуцилри.
Балбуц ахирличи биркухIели, СВО-лизи чарриубли аркьуси Зайнаб ГIязизовнас цалабикибтани савгъатуни пешкешдариб ва Украинализибти нушала бургъантас посылкаби дархьиб.
Дергъра жяв-жявли таманбиубли, дунъяличи даршудешра тIинтIбиубли сунес ахIерти кIелра уршиличи ара-сагъли Зайнаб МяхIяммадовара, илкьяйда лебил СВО-ла бутIакьянчиби чарбухъаб!
Басират Каймаразова
