Поэтунани, далайчибани ва гъайла устнани чарх-бекIла жагадешличибли, кабизалачебдешличибли, гIякьлуличибли ва малхIямдешличибли декIарбулхъути чехьерти жайрунтачил цугбурцули бирар. Бархьси саби, дахъал журала мицIираг-ургар жайрунти гьарли-марли чула кегIебдешличирли декIардулхъулира дирар. Илкьяйдали гIялам халкьла ургаб чула черикIла къиликъуначибли ва баркь-бацличил декIарбулхъути хьунул адамтачила сецад жагати гъайличил гъайвикIалра, илдас гьарли-марси кьимат абаахъес гьамадси ахIен. Илдачила назмурти, хабурти, макьалаби,… лукIуцадли урхьула лутIилизир якьутла мачни цаладяхъес ахърихIебикIуливан, дубурличиб акIубти рурсби сипатбаресра гьариллис-декIар имканхIебикIур. Тяп илдигъунти дубурла исбагьибазирадли ца сари «Замана» газетала гъамси гьалмагъ ва пагьмучерси журналист Шамилова Хамис ГIяхIмадхановна. Ил газетализир рузухIейчирадли жагьил лукIантас мисалли ретаурси сари ва ишхIелла манзиллизирра илдала умутчерси хъарихъ ва къакъбяхъ сари.
Дусмачи хIерхIеили, пасихIдешли дагьрила капарай гIярбукIай арцла гажинван варакьбарибси, гIякьлу-дагьрила нурли уркIи-рухI рурхIахъуси, вавнала майдайчир гIинтIла вававан декIаррулхъуси мухIен рурсила сархибдешуначи «Замана» газетала къугъаси къушум мурталра хIулбуркIули бирар. Иш гьакIлисра илала бамсриагарси бузери ахъли кьиматлабирули, ил шабагъатлабарниличи разибиахъубти заманалантани Хамис ГIяхIмадхановнас къаркъаван чIумачи арадеш, кахIебурхуси талихI, бузерилизир гьатIира дахъал чедибдешуни диубли дигниличила балахъули саби.
Дагъистан Республикала рурибси хIянчизар, писательтала, журналистунала ва Россияла театртала вакилтала союзунала член, театртала искусствола ва кинола шайчир ДР-ла пачалихъла кIел премияла лауреат, ДР-ла ГБУ-ла РРЖ-ла «Дагъиста хьунул адам» журналла руководитель-бекI редактор Хамис Шамилова акIубси сари Ахъушала районна МухIела шилизир 1973 ибил дуслизир. Илини ДГУ-ла журналистикала отделение таманаибси саби, юридический факультетла аспирантурализир ва ДГПУ-ла психологияла факультетлизир ручIули калунси сари. ГIур Хамис ГIяхIмадхановнани Москвализибси А.М.Горькийла уличилси литературала институт белчIун.
ГIяхIцад дусмазир ил журналистла санигIят бузахъули сабухъчерли рузули сари, телевидениелизир авторский проектуни далкьарахъули, документальный фильмаби кайсули калун. Ил назмуртала кIел сборникла автор сари.
Ишди бурхIназир журналистика гьалабяхI башахънилизи белгиси пай кабирхьни багьандан ва нушала республикализир сархибдешуни дирахънила баркьудилизир бутIакьяндеш дирни пикрилизи касили, Хамис Шамилова Дагъистан Республикала Правительствола Грамоталичил шабагъаткарариб. Дагъиста пресса гьалабяхI башахънилизи кабирхьуси пай ахъли кьиматлабирули, Россияла печатьла БархIиличил бархбасахъи, Россияла журналистунала Союзли дурабуркIуси балбуцличиб ХIурматла Грамотабачил шабагъатлабарибти журналистуни-ургар Хамис Шамиловара лерри.
Хамис ГIяхIмадхановна, хIуни бузахъуси дебали мягIничебси ва ахъси даражала санигIятла хIурмат гьатIира ахъбурцниличи ва даим гьаларяхI рашниличи дирхулра.
«Замана» газетала коллектив
