Наб хIяжатси материал баргес или «Замана» газетала архивлизив умцIулри. Хапли ца номерлизиб ДГУ-ла филологияла факультетлизир ручIуси 1-ибил курсла студентка Ханум ГIялиевала гьалаб белкIунси макьала къаршибикиб.
Макьала белкIунсири ил верхIъибил класслизи рашухIели. Илини илар сунела школаличила, школала мугIяллимтачила, школала гIяхIтигъунти бучIантачила, ва школала чедибдешуначила бурули сари.
Гьала-гьала ил макьалализибси сурат чебаибхIели, нуни ралуси студентка хIерургар или васвасухъунра, чариубли макьалала авторла у сагадан белчIунра. ИлхIели якьинбарира гьанна ДГУ-лизир ручIуси, наб тянишси Ханум риъни.
Дила сегъуналра ташмишдеш аги Ханумлизиб макьалаби лукIес пагь лебнилизиб. Илгъуна пагь дила пикрили, иличи бакIибси бургар сунела дудешла рузи, бусягIятла замана газетала бекI редакторли рузуси Салимат ГIялиевазибад. Ну вирхулра, Ханумли ил санигIят даимбирниличи.
Ханум ГIялиевачила бурасли, жагаси ва малхIямси, гьарил адамличи дигили рицIибси, нешла мез ва культура дигахъуси, илди гIердуцес кьаслизирси ва челябкьуси наслуличи даахъес къайгъичерси рурси сари ил. Илгъуна къиликъ марбирули саби ил ДГУ-ла филологияла факультетлизи карерхнилира. Илини кьасбирули сари декIар-декIарти конкурсуначир, факультетла яра республикала даражала далдуцуназир бутIакьяндеш дарес.
Пикриухъалли, илизиб гIяртистла пагьму биэсра асубирар. СенахIенну Ханумла ГI.Батирайла уличилси даргала музыкала-драмала театрла бекI режиссёр, художественный руководитель, РФ-ла урибси культурала хIяракатчи Ибрагьмов Мустапа ГIябдиевичра тухум ветарули сай.
Ханум ГIялиевани сегъуна-биалра хабар яра назму бучIули аргъасли, ну тамашавирули вирус. СенахIенну илини ил гIяртистливан зайбикIахъули, ахъли ва саркъахъили, чиналра къалабахIерикIули бучIа. Илини бучIусиличи иштяхIличил гьарил адам лехIирхъур. ЦацахIели назмулизивси бекI игит мякьлав левсиван билзан. Ил игитла уркIила хIялани, илала сипат Ханумли гьарилличи жагали диахъули сари.
Нуни аргъиливан, Ханум белчIудилизирра сарерхурси, гъирачерси, адам сари. Илини чуйнара-сера школала, районна ва республикала олимпиадабачир гьаларти мерани сархиб. Ва гьаннара ил къайгъилизир сари сунела багьудлуми чедицIахъес ва имцIадарес.
Ну учIуси факультетлизибси дарган мез ва литература гIердуцили, гьаладяхI дашахънила шайчибси жамигIятла председатель сайливан, даргала кьукьяла рурсбази ва уршбази кумек, яра сегъуна-биалра балбуц гIеббуцес гIягIнили саби или бурасли, Ханум ва иличил барх бучIути къуймур рурсби бегI гьалаб кумекличи музабулхъули бирар. Гьар даим ну гIевуцили кумекбирнилис илдас халаси баркалла балахъулра.
Ну вирхулра, Ханум ГIялиевани верхIъибил класслизиб бехIбихьибси журналистикализи гьуни даимбирниличи. Рузи Ханумлис гIямрулизир разидеш, сархибдешуни ва бегIлара хIяжатси къаркъаван чIумаси арадеш дулгулра.
МяхIяммадшапи Матаев
