Хайдакьла районна ЧIибяхIнила шилизивадси ургъан МяхIяммад ХIусейхановли хIурмат-кьиматличил дявила чебла ихъули саби, ВатIа хъархIерагардеш балтахънилизи белгиси пай кабирхьули сай.

Дагъиста Чедибдешла волонтёртала Центральный штабла председательла къуллукъ бузахъуси М.ХIусейханов, сунела гIямрулис урехи алкIниличи хIерхIеили, бургъантас хIяжатти секIал духили дявила хасси балбуц бетурхуси мер-мусаличи чуйнара вякьунсири.

Хъули чарухъунхIели, Дагъистайзибадти бургъантачил бархбас кабизахъурли, чис се хIяжатлил белгибарили, илдас кумек гIеббаахъес къайгъи дакIубири.

«Миллатчибазирад азаддатахъурти мер-мусаличиб декIарси аги кабизурлири. Бургъанти лерилра гIямрулизиб балутиван гъамтили бетарулри. Иларти тяхIяр-кьяйда хIисаблизи касили, ну гIярмияла къяяназив, дила цаванзалантачил варх виэс гIягIнили саби ибси пикриличи вакIира», — буриб МяхIяммадли.

Ил 2023 ибил дусла июльла 9-личив сай гIяхIъулали дявила чебла ахъес ва бургъантачил дарх душмайс къаршидеш дарес СВО-лизи арякьун. Танкабала батальоннизиб къуллукъбирули, М.ХIусейхановли душма хIял-тIабигIятла дигIяндеш гьаргдариб.

«Дила гIямрулизир хабарагарти анцIбукьуни диубти ахIен. Гьарил мурул адамлис ил къиянси гьуни ахъес кьадарбирни балухIеливан, дявила хасси балбуцличира гьаб-гIергъидешличил хIядурвикIули, вашулри», — викIи ургъан.

Дявилизив кьяшлизивад вяхъили, реабилитация дураберкIес МяхIяммад хъули вакIибсири. Кьяш арабиубли гIергъи, илини сагадан дявила къуллукъ даимбариб.

Дявила хасси балбуцлизир гъабзадеш дакIударни багьандан, РФ-ла Президент В.Путинна ХIукмуличи хъарахъили, МяхIяммад ХIусейханов Жуковла медальличил шабагъатлавариб.

Хайдакьла районна администрацияла пресс-служба