Лебил Россияла жамигIятла-пачалихъла дурхIнала ва жагьилтала «Цаибтала хIяракат» 2022 ибил дусла июль базлизиб акIахъубсири. ХIяракатла бузери дурхIнала ва жагьилтала жамигIятла цалабяхъуни, кьукьни цаладяхъили, улкалис пайдачебли бузниличи бяхIчиаибси саби. БусягIятла замана баягъи хIяракатла отделениеби улкала лерилра муниципалитетуназир лер, сагати мер-мусаличирра дархли.
Ил тяхIярли Дагъиста лерилра муниципалитетуназирра отделениеби лер. Иш яргалис декIарбарес дигулра Лавашала район. Наб дила макьалализиб отделениеличила ва илала руководительличила бурес дигулра.
АсхIяб МяхIяммадов акIубси сай 1995 ибил дусла октябрьла 1-личив Лавашала районна, Лавашала шилизив. Хъалибарглизив ил бегIлара виштIасири. БегIтани чула къиянти яшавла-шуртIрачи хIерхIеили, илизи чебяхIси даражала багьуди касахъиб.
АсхIябла белчIудила гьуни жявли бехIбихьибсири — ил шел дус виубхIели, МяхIячкъалала » Гулливер» бикIуси школализи керхур. Тах шагьарлизиб урег-ибил класс таманбарили гIергъи, илини белчIуди Москвализибси англияла мез мурхьли руркъуси школализиб даимбариб. КIинайс Лавашала кIиибил школа черяхIти кьиматуначил хъараахъур. АсхIяб Ломоносовла уличилси Москвализибси МГУ-лизи учIес керхур. 2018 ибил дуслизиб илаб «Москвала школала экономика» факультет таманбариб. Гьанна биалли, Дагъиста пачалихъла Университетла социальный факультетлизиб чеимцIаси багьуди кайсули сай, «Организация работы с молодежью» санигIят хIясибли.
Университет таманбарили гIергъи, АсхIяб «Ernst & Young» бикIуси улкни-ургабси компаниялизив узес вехIихьиб. Илав аудиторла кумекчили узули калун. Ил 2020-ибил дуслизив сунела шилизи чарухъун, бегIтас кумек хIяжатли биъни багьандан. 2023 ибил дуслизив АсхIяб МяхIяммадов Лавашала районна «Шила хозяйствола управление» МКУ-ла АПК-ла специалист ветаур. Илала гъира чебаили, Лавашала районнизибси «Цаибтала хIяракатла» отделениелис бекIдеш дарахъес ибси пикри гьалабихьиб. Студентли вирухIели илини «брейн-ринг»-ла хIязаназир жигарчерли бутIакьяндеш дирутири. ИлхIели АсхIябли 5 брейн-ринг дурадеркIиб.
Дагъистайзи чарухъунхIели, илини районнизир интеллектуальный хIязани, спортла абзани дурадуркIес вехIихьиб. СанигIятлашалти устадеш чеахъдирнилизиб гIяхIси сабабли бетаур ДР-ла багьудила Министерстволичил ва «Цаибтала хIяракатличил» республикала даражала «брейн-ринг» хIязла кIел абз дурадеркIни.
АсхIябла бекIдешлиуб халаси кьадрила платформа акIахъуб, сунезира декIар-декIарти журала кьукьни кадурхути:
— лебилра районнизибад 400-личиб имцIали бучIанти;
— 30-йчибра имцIали жагьилти-активистунала вакилти;
— жамигIятла проектуни гIердуцес хIядурти 15-йчибра имцIали меценат;
— районна администрацияла вакилти.
АсхIяб МяхIяммадов гьарил баркьудилизир бутIакьяндеш дарес къайгъилизиври.
Илини декIар-декIарти конкурсуназир ва грантуназир чедибдешуни сархиб. ГIергъити дусмазив Дагъистан Республикала БекIла Грант ва лебил Россияла «Шила гьабкьяби» бикIуси конкурслизирра чедибдеш сархиб.
АсхIябли бурни хIясибли, ил мурталра сай-алавти адамтас гIяхIдеш барес къайгъилизив вирар. Руководитель тяхIярли илис адамти цахIнабирхъес, кьукьни алкIахъес ва декIар-декIарти журала проектуни детурхахъес хIяжатли саби. Илала бузерили дахъал бяхIчибизуни духIнадурцули сари: белчIудиличибад бехIбихьили, спортла далдуцуначи, жагьилтачилси бузериличи, ва шила мер-муса ункъдирути тяхIуртачи бикайчи. Нушанира АсхIяблис «Замана» газетала шайзирад сунела бузерилизир дахъал сархибдешуни дулгулра.
Рабадан БяхIяммадов
