ГIисаева Барият Ахъушала районнизир бахъал адамтани ралуси хIянчизар сари,- хIерагьесра хIебирар, сенахIенну гьанна хIябцIали дус ил рузули сари гьар бархIи адамти дугьабилзуси мерличир — районна соцзащитала управлениелизир.
— Дила бузерила гьуни бехIбихьибсири комсомолла райкомлизиб, — гьанбиркахъули сари Бариятли. — Илис гIергъи камси замана декIар-декIарти учреждениебазир рузули калунра. 1994 ибил дусличирад ишар рузулра.
— Хъалибаргла ва дурхIнала масъултазиб бузуси отделлизир рузухIели, Б.ГIисаевани хаслира чебетаахъили хIянчи бирусири, сунечи дугьабизурти баркалла бикIахъули, гьарилла къуллукъ заманаличиб бекIбирули. ИшбархIира ил халати жавабкардешличил бузути хIянчизартазирад ца сари, — илгъуна кьимат кабатур Барият МяхIяммадхIяжиевнала бузерилис районна администрацияла бекIла заместитель, районна хьунул адамтала Советла председатель Эльвира ХIясанхIусейновани.
— Барият районна хьунул адамтала Советла членра сари, ва ил шайчибра гьарил хъарбаркь чекаризурли таманбирули рирар.
Чебетаили бузути, халкь-ургаб балгунти неш-дудешли абикьурти авал узи-рузила рухIнар халараибси сари Барият. Илала дудеш МяхIяммадхIяжини ва неш Написатли, Ахъушала шилизиб кинотеатр бузухIели, гьар бархIи зал бицIили адамти киноличи башуси замана халаси дигиличил чула санигIят бузахъули, киномеханикла хIянчилизиб цалис ца кумекбикIули бузули, шантала хIурмат сархибсири. ИшбархIи илди цалра агара, бунагь-хатIа урдуцаб чула!
ХIябал рузизибад кIел Москвализиб чула хъалибаргуначил хIербирули саби. Илдала цайли цаси узи МяхIяммад-Расул районна бегIлара гIяхIил бузути учительтазивад ца сай. Районна центрлизирти школабазиб бузути педагогуни-ургаб имцIатигъунти хьунул адамти сабхIели, илдас ургахIевхъи, МяхIяммад-Расул алавчарти шимала школабази узес вашули сай. ИлхIелира адамтала хIурмат сархили, сунела машиналичи кабатурли, районна центрлизи лябкьутира чарбиубли хъули аркьутира чула мераначи биахъули вирар, гьунчив цугикибсилра валтули ахIен илини. Илдигъунти адамдешла вегI узи левли виалли, арали ватабну сай, Барият-декIар адамтас дяхI шаласи, цархIилла къуллукъ бекIбарили, разиварес кьаслизирси хIериэс рирару? Илгъуна саби ГIисаевхъала хъалибарглизиб касибси бяркъ.
Бариятла лер хIябал диплом: кооперативный техникумла, ДГУ-ла социальный факультетла, халкьла хозяйствола институтла. АнцIбукь дипломтазибцун ахIен, вегIличи хъарси чебетаахъили таманбирнилизиб, цархIилтала уркIи иргънилизиб, хIурмат-хатирдарес балнилизиб саби. Бариятли бузахъуси хIянчилис бикIули саби «Старший специалист по выплатам». Отделла хIянчизартачи хIянчи дутIибхIели, Б.ГIисаевачи хъарли саби верхIел шила администрациялизибти адамти — Цугнила, ТIантIала, ХIямшимала, Шукьтила, НецIала, Нахкила, Кьассагумахьила — «Социальный контракт»-лизи каберхурти адамти, льготабачил пайдалабикIути учительти, медицинала хIянчизарти ва бахъал дурхIнала бегIти.
Илдазивад гьарилла къуллукъ заманаличиб бекIбарес къайгъилизир рирар Барият, иличил барх — сунени барибси хIянчила отчет кьанхIебиахъесра.
— «Социальный контракт» хIясибли пачалихъла шайзирад кумеклис арц касибтала черкад заманаличир, дебали чедетаибти документуни тIалабдирес гIягIниси саби, — бурули сари Б.ГIисаевани.
— Чекарилзули рирус ил шайчиб барес гIягIниси убкахIелахъес, ахтардибарибхIели дила хIянчи гIяхIил баргахъес.
Кьисматли Бариятлис дурхIни пешкешхIебариб биалра, илис цархIилтала дурхIнас гьарбизурли дигахъу, пачалихъла шайзибад дурхIнас лебси кумек чула бегIтачи баахъес къайгъилизир рирар.
— Дила бегIти авцIанну верхIра дус барх бузули калунти саби, — бурули сари Бариятли. — ГьанхIебиркур илди гьачамалра гIяйиб-нягIнализи бикили. Ил багьандан нунира кьасбирули рирус дила хатIаличибли начальникличи гIяйиб хIебакIахъес.
Чебетаибси хIянчи багьандан Б.ГIисаевани ХIурматла Грамотаби касили сари. Сунела уркIилис бегIлара разидеш бихуси биалли, адамтала баркалла саби. Ил чуйнара калун шила Советла депутатли, выбортала замана избирательная комиссияла членни. Адамти-ургар ралгунси, хIянчи дигуси, гьар секIал заманаличир дирес, халати жавабкардешличил рузес бурсириубси Барият МяхIяммадхIяжиевнас сагаси дуслизир арадешра адамтала баркаллаличил дурабуркIуси хIянчилизир сархибдешунира диаб!
П.Маллаева
