ГЛавашала шила бекI Камил ХIясановли кумекчибала кьукьяличил варх республикализиб бетурхуси «Дари добро» бикIуси балбуцлизир бутIакьяндеш дариб. Балбуцла дазурбазиб илди Лавашала шилизивадси СВО-ла бутIакьянчи МяхIяммад МяхIяммадовла хъалибаргличил гьунибаиб. Хъалибарглис илдани савгъатуни дедиб ва гIяхIгъабза урши айкьнилис халаси баркалла багьахъур.

Гьунибаънилизир илкьяйдали бутIакьяндеш дариб «Память гор» бикIуси республикала цахIнабикла районна отделениела председатель Ильяс Ибрагьимовлира. М.МяхIяммадовла хъалибаргличил илдани халаси ихтилат дураберкIиб.

Камси хайрила дегIти, арадешлизир нукьсандешуни лерти, бахъал дурхIнала дегIти хъалибаргунас, СВО-ла бутIакьянчибала хъалибаргунас ва цIуръабас фондли халаси кумек бирули саби.

«Дари добро» фондла пикрила дурав кахIелун Лавашала шила бекI Камил ХIясановра. ГIяхIбаркьла далдуцуназир жигарла бутIакьяндеш дирнилис илра шабагъатлавариб.

Лавашала районна администрацияла пресс-служба